Салвадорда 50 млн долларлик кокаин мусодара қилинди

Экспертлар қўлга киритилган гиёҳвандлик воситалари Шимолий Америкага юборилиши керак бўлганини тахмин қилмоқда.

Фото: x.com/Nayib Bukele

Салвадор ҳуқуқ-тартибот идоралари 2 тонна кокаинни мусодара қилди. Бу ҳақда мамлакат президенти Найиб Букеле ўзининг Х ижтимоий тармоғидаги саҳифасига ёзиб қолдирди.

Унинг сўзларига кўра, Эстеро Жалтепеқуе бўғозида тўхтатилган кемада уч нафар колумбиялик қиймати 50 миллион долларга етадиган гиёҳвандлик воситаларини олиб кетаётган бўлган.

Экспертлар қўлга киритилган юк Шимолий Америкага юборилиши керак бўлганини тахмин қилмоқда. Прокуратура қўлга олинган шахсларнинг уюшган жиноий гуруҳларга алоқадорлигини аниқлаш бўйича тергов бошлаган.

Букеленинг таъкидлашича, охирги саккиз ой давомида Салвадор ҳуқуқ-тартибот органлари халқаро сувларда 15 тоннадан ортиқ кокаинни тўхтатиб қолган бўлиб, уларнинг умумий қиймати 380 миллион долларга етади.

Аввалроқ Шимолий Рейн-Вестфалия федерал ерида – Мёнхенгладбах, Дуйсбург ва Крефелд шаҳарларида, шунингдек, Фирзен, Хайнсберг ва Нойс округларида жойлашган озиқ-овқат дискаунтерининг ўн бир шохобчасида банан қутиларидан пакетларда жами 95 килограмм кокаин топилган эди.

Шунингдек, Испания ҳуқуқ-тартибот органлари оғирлиги 13 тоннага тенг кокаинни тўхтатиб қолгани тўғрисида хабар берилганди — бу мамлакат тарихида мусодара қилинган энг катта партиядир.

#кокаин #Салвадор