Бутун мамлакат — зулмат ичида: Кубада кенг кўламли блэкаут рўй берди

18 октябр куни Кубада йирик иссиқлик электр станциясидаги авариядан кейин электр энергиясидан тўлиқ узилиш содир бўлди. 10 миллионга яқин киши электрсиз қолган. Электр энергияси таъминоти 19 октябр куни қисман тикланганди, аммо якшанбага ўтар кечаси яна бутунлай ўчди, деб ёзади BBC News. Ҳудудга «Оскар» тўфони яқинлашиб келаётгани вазиятни янада оғирлаштирган. Прогнозларга кўра, шамол тезлиги соатига 140 километрга чиқадиган тўфон Куба соҳилларига маҳаллий вақт билан 20 октябр куни кундузи етиб келади. У мамлакатнинг шарқий ҳудудларига сув тошқини ва кўчкилар олиб келиши мумкин.

Куба президенти Мигел Диас-Канел расмийлар «тўфон муқаррарлигини ҳисобга олган ҳолда одамлар ва иқтисодий ресурсларни ҳимоялаш учун қаттиқ иш олиб бораётгани»ни айтган.

Diario de Cuba газетаси ёзишича, электр узилиши энергетик инқирозни кучайтирган — Кубада сўнгги икки ҳафтада мунтазам равишда кунига бир неча соатга электр ўчирилаётганди. Бош вазир Мануэл Марреро Крус телеомурожаатида узилишларга эскирган инфратузилма, ёнилғи етишмаслиги ва энергия истеъмоли ортиб кетгани сабаблигини айтган. «Медуза» Кубадаги кенг кўламли блэкаут қандай кўринишда экани акс этган фотожамланмани тақдим этди.