Қозоғистонда Telegram офиси очилади

Мамлакат расмийлари ноқонуний контентни зудлик билан ўчириш ва бузғунчи каналларни блоклаш учун Telegram билан фаол ҳамкорлик қилаётганини таъкидламоқда.

Фото: Telegram/Du Rove's Channel

Қозоғистонда Telegram мессенжерининг офиси очилади. Бу ҳақда Қозоғистон рақамли ривожланиш, инновациялар ва аэрокосмик саноат вазири Жаслан Мадиев АҚШ Савдо-саноат палатаси ва Американинг йирик компаниялари вакиллари билан учрашувда маълум қилди.

Мадиев ўз идораси ноқонуний контентни зудлик билан ўчириш ва бузғунчи каналларни блоклаш учун Telegram билан фаол ҳамкорлик қилаётганини таъкидлади.

«Бизнинг қонунчилигимизга мувофиқ, Telegram, WhatsApp ва TikTok каби интернет платформалар энди Қозоғистонда ўз вакилига эга бўлиши шарт. Telegram билан аллақачон уларнинг вакилини тайинлаш ва офис очиш бўйича келишувга эришилган», деди вазир. Унинг қўшимча қилишича, мессенжер билан келишув — контент устидан назоратни кучайтириш учун муҳим қадам.

Telegram ўз фойдаланувчилари ҳақидаги маълумотларни учинчи шахсларга ошкор қилмайдиган энг хавфсиз мессенжерлардан бири деб ҳисобланган. Сентябр ойида унинг асосчиси Павел Дуров Telegram тегишли органларнинг асосли сўровларига кўра фойдаланувчиларнинг IP манзиллари ва телефон рақамларини ошкор қилишини айтган эди.

Ўтган ёзда Дуров Марказий Осиё мамлакатлари – Қозоғистон, Ўзбекистон ва Қирғизистонда бўлди. Қозоғистон пойтахтига сафари чоғида Остона халқаро молия маркази регулятори Toncoin криптовалютаси билан савдо қилишни маъқуллади. Ўзбекистонга сафари ҳақида батафсил маълумот берилмади.

#Қозоғистон #Telegram #Павел Дуров