Венгрияда мухолифатнинг кўп минг кишилик митинги бўлиб ўтди

Норозилик акциясини Венгрия сиёсий майдонида илк бор феврал ойида пайдо бўлган ва катта қўллаб-қувватловга эга янги мухолифатчи уюштирди.

Фото: Denes Erdos/AP/picture alliance

5 май, якшанба куни Венгриянинг иккинчи йирик шаҳри Дебреценда Оналар кунига бағишланган мухолифат митинги бўлиб ўтди. Уни феврал ойида Венгрия сиёсий майдонида илк бор пайдо бўлган янги мухолифатчи, ҳукмрон ФИДЕС партиясининг собиқ аъзоси, ҳуқуқшунос Петер Мадяр ташкил қилган. Ҳукмрон партиянинг таянчи ҳисобланган шаҳарда бўлиб ўтган митингда 10 минг нафаргача одам қатнашди.

Дебрецен марказида Мадярдан ташқари машҳур актёрлар, қўшиқчилар ва руҳонийлар саҳнада чиқиш қилди. Мухолифатчи ўз нутқида Венгрия бош вазири Виктор Орбан ҳукуматининг ташқи ва ички сиёсатини танқид қилди ва Венгрия ҳукуматини коррупцияда айблади. Шунингдек, у мамлакатда болалар нафақаси миқдорининг ниҳоятда паст даражасини танқид қилди.

Аввалроқ Мадяр аллақачон Будапештда бир нечта митинглар уюштирган эди. Сиёсатчи Венгрия собиқ адлия вазири Юдит Варганинг собиқ эри бўлиб, у феврал ойида педофилия билан шуғулланган шахснинг афв этилишига оид можаро туфайли истеъфога чиққан эди. Худди шу ойда Мадяр ФИДЕС таркибидан чиққанини ва давлат хизматидан кетишини эълон қилди. Март ойида у Европарламентга сайловларда қатнашадиган, унчалик таниқли бўлмаган «Ҳурмат ва озодлик» (TISZA) марказчи партиясига қўшилишини билдирганди. Бир неча ой ичида илгари номаълум бўлган адвокат машҳур сиёсатчига айланди ва Европа парламентига сайланиш учун реал имкониятга эга бўлди. Унинг шиорлари аҳоли орасида қўллаб-қувватланганига қараганда, Мадяр келажакдаги сайловларда Орбан учун таҳдидга айланиши мумкин.

#Венгрия #Петер Мадяр