Россия Белгород вилоятида ҳарбий аэродром қурмоқда

Мустақил матбуот Украина билан чегарадан 75 км узоқликда янги ҳарбий аэродром қурилиши ҳақидаги ижтимоий тармоқлар маълумотларини тасдиқловчи сунъий йўлдош суратларини эълон қилди.

Ил-76 Фото: Petrov Sergey/Russian Look/picture alliance

Мустақил матбуот хабарига кўра, Россия расмийлари Белгород вилоятида янги ҳарбий аэродром қуришни бошлаган. 29 апрел, душанба куни медиа-компаниялар Алексеевка шаҳридан 9 км ғарбда ва Россия Федерацияси кенг кўламли урушни давом эттираётган Украина билан чегарадан 75 км узоқликда жойлашган қурилиш майдонининг сунъий йўлдош тасвирларини эълон қилди.

Хабарларда айтилишича, аэродромнинг учиш-қўниш йўлаги узунлиги тахминан 1800 м бўлиши мумкин, бу Ил-76 ҳарбий-транспорт самолётларини қабул қилиш ва жўнатиш имконини беради.

Алексеевка яқинидаги янги аэродром

Шу тариқа журналистлар ижтимоий тармоқларда пайдо бўлган маълумотни тасдиқлади. Мустақил матбуот RedIntelPanda OSINT-аккаунти маълумотларига асосланган, у шу куни X’да Белгород вилоятида ҳарбий логистика маркази қурилиши ҳақида ёзган эди. Унинг маълумотига кўра, 2023 йил июл ойида бу ерга йўл қурилган ва қиш бошланишига қадар учиш-қўниш йўлагининг схемаси деярли якунланган, апрел ойида эса йўл қопламаси ётқизилган.

Матбуот хабарига кўра, Россия Қуролли кучларининг муҳим логистика маркази Белгород вилоятидаги Алексеевкада жойлашган.

#аэродром #Белгород