Зеленский Ватиканни Путин билан учрашиш учун энг яхши жой деб атади

Унинг сўзларига кўра, «Ватикан бошқалардан ажралиб туради: у ахлоқий куч бўлиб, ҳеч қандай ҳарбий-сиёсий ёки иқтисодий манфаатларни кўзламайди».

Фото: Globallookpress

Ватикан Россия президенти Владимир Путин билан учрашиш учун энг яхши жой бўлиши мумкин, деди Украина президенти Владимир Зеленский La Reppublica газетасига берган интервьюсида. Интервью матни Украина президенти офиси сайтида жойлаштирилди.

«Ҳа, у барча нуқтаи назардан энг мақбул жой бўлиши мумкин эди. Ватикан — дарҳақиқат тинчлик тўғрисида гаплашиш учун энг яхши жой», — деди Зеленский.

Зеленский шунингдек, Путин билан Донбассдаги вазиятни муҳокама қилиш учун учрашув ўтказилишига ишонч билдирди. Ҳозирча учрашув тартиби, жойи ва вақти белгиланмади, деди у.

Аввалроқ Зеленский Путинга «Донбасснинг исталган ерида учрашиш»ни таклиф қилганди.

Бунга жавобан Путин Зеленский «истаган вақтида» Москвага келиши мумкинлигини айтди.

26 апрел куни Зеленский Путин билан учрашувга тайёргарлик кўриш учун ўз офиси раҳбари Андрей Ермакка топшириқ берганини маълум қилди.

#Владимир Путин #Ватикан #Володимир Зеленский