Ўғри Исландиядаги қамоқдан Швецияга бош вазир билан бир самолётда учди

Исландия тарихидаги энг катта ўғрилик учун ҳибсга олинган Синдри Тор Стеффансон қамоқдан қочиб, Швецияга учди. Гувоҳларнинг маълум қилишича, ўғри мамлакатни Исландия бош вазири билан бир самолётда тарк этган. Associated Press шу ҳақида хабар берди.

Полиция маълумотларига кўра, Стеффансон қамоқ деразасидан қочган ва Кеблавикдаги халқаро аэропортга йўл олган. Швеция ва Исландия Шенген зонасида жойлашгани ва Евроиттифоқ фуқаролари бу мамлакатлар ўртасида шахсни тасдиқловчи ҳужжатсиз парвоз қилиши мумкин бўлгани учун аэропортда паспортни кўрсатишга ҳожат бўлмаган.

Стеффансон парвоз қилган самолёт йўловчиларидан бирининг маҳаллий нашрларга билдиришича, Исландия бош вазири Катрин Якобсдоуттир ҳам худди шу рейсда учган. У Ҳиндистон бош вазири билан музокаралар учун Стокгольмга парвоз қилиши керак бўлган.

Бироқ полицияда қайд қилинишича, ўғри чипта харид қилиш учун бировнинг паспортидан фойдаланган. Шу боис терговчилар Стеффансоннинг унга қочишга ёрдам берган шериги бўлган деб ҳисоблашмоқда. Полициячилар бу борада икки кишини сўроқ қилишга улгуришди.

Ўғри хавфсизлик даражаси паст бўлган қишлоқ қамоғида сақланган. У ерда маҳбусларга телефон ва интернетдан фойдаланишга рухсат беришар, қамоқхона биноси эса ҳатто дарвозасиз бўлган.

Стеффансон мамлакат тарихидаги энг йирик ўғриликни уюштиришда айбланган - умумий суммаси 2 миллион долларни ташкил қилган 600 та биткоин майнинги ускунаси ўғирланган. 2018 йилнинг февралидаги тергов ишларига қарамай, ўғирланган компьютерлар ҳануз топилганича йўқ. Баъзи версияларга кўра, қурилмалар мамлакатдан ташқарига олиб чиқилган, зеро 340 минг киши яшовчи жойда криптовалюта майнинг тизимларининг бу қадар кўплиги аллақачон жамоатчилик эътиборини тортган бўларди.