Xitoy Tibetda dunyodagi eng yirik GES qurishni boshladi

Xitoy Davlat kengashi raisi Li Tsyan gidroenergetika sohasidagi eng yirik loyiha qurilishi boshlanganini e’lon qildi. Tibet hududidan oqib o‘tuvchi Yarlung Tsangpo daryosida beshta kaskadli GES quriladi. Ularning qurilishiga taxminan 167 milliard dollar sarflash rejalashtirilgan, deb yozdi China Daily.

Stansiyalarni qurish va ularga xizmat ko‘rsatish bilan China Yajiang Group kompaniyasi shug‘ullanadi. Inshootlar yiliga 300 mlrd kVt·soat elektr energiyasi ishlab chiqaradi. Ishlab chiqarilgan elektr energiyasi Tibetni energiya bilan ta’minlaydi, shuningdek, mintaqa tashqarisiga ham yetkazib beriladi.

BBC nashrining ta’kidlashicha, inshoot hozir dunyodagi eng yirik gidroelektr stansiyasi bo‘lgan Xitoyning «Uch dara» to‘g‘onidan uch baravar ko‘proq energiya ishlab chiqara oladi.

Xitoyning janubiy Tibetda yangi GES qurish rejalari qo‘shni mamlakatlar tomonidan bahsli hudud ustidan to‘liq nazorat o‘rnatish va yangi iqtisodiy bosim vositalarini qo‘lga kiritishga urinish sifatida qabul qilinmoqda.

Jumladan, Hindiston va Bangladesh rasmiylari yangi GES qurilishidan xavotir bildirmoqda: inshootlar mahalliy ekologiyaga va Yarlung Tsangpo daryosi holatiga salbiy ta’sir qilishi mumkin. Shuningdek, ularning fikricha, GES suv toshqinlarini keltirib chiqarishi yoki quyi oqimda suv tanqisligiga olib kelishi mumkin.

Ekspertlar, shuningdek, shunchalik tor va chuqur darada damba qurilishi ko‘plab yer qimirlashlari yuzaga kelishiga olib kelishi mumkinligini taxmin qiladi. Yer qimirlashi va zilzilalar to‘g‘onning o‘zi uchun juda xavfli. Uning vayron bo‘lishi katta falokat va ko‘plab qurbonlarga olib kelishi mumkin.