Rossiya dumasi ekstremistik materiallarni qidirganlik uchun jarima tayyorlamoqda

Rossiya Davlat dumasi deputatlari «ekstremistik materiallarni qidirish va ular bilan tanishganlik» uchun 5 ming rublgacha jarima solishni nazarda tutuvchi tuzatishni ma’qulladi, deb xabar berdi TASS agentligi.

O‘zgartish mualliflari Ma’muriy javobgarlik to‘g‘risidagi kodeksga «Ekstremistik materiallarni qidirish va ulardan foydalanish imkoniyatiga ega bo‘lish, shu jumladan kirishi cheklangan axborot resurslariga, axborot va telekommunikatsiya tarmoqlariga kirish uchun dasturiy va texnik vositalardan foydalanish» nomli 13.53-moddani qo‘shishni taklif qilgan.

«Ekstremistik materiallarni qasddan qidirish» uchun uch mingdan besh ming rublgacha ma’muriy jarima solish taklif qilinmoqda. Bundan tashqari, VPN xizmatlarini reklama qilish uchun 500 ming rublgacha jarima solishni nazarda tutuvchi o‘zgartirish kiritiladi. Davlat dumasi, shuningdek, VPN xizmatlaridan foydalangan holda jinoyat sodir etishni og‘irlashtiruvchi holat sifatida tan oladigan tuzatishni ham qabul qildi.

Kreml tashabbusning mohiyatini izohlashdan bosh tortdi va deputatlarni uni batafsilroq tushuntirishga chaqirdi. Rossiya Federatsiyasi prezidentining matbuot kotibi Dmitriy Peskov bu taklif bilan tanish emasligini aytdi.