Jahon | 12:41 / 19.07.2025
948
2 daqiqa o‘qiladi

Rossiya Adliya vazirligi Activatica portalini «chet el agentlari» ro‘yxatiga kiritdi

«Chet el agentlari» ro‘yxatiga yana yetti kishi kiritildi, ular orasida jurnalistlar Kseniya Kirillova va Masha Mayyers, shuningdek, Shaninka politologiya fakulteti dekani Vasiliy Jarkov ham bor.

18 iyul, juma kuni Rossiya Adliya vazirligi «chet el agentlari» ro‘yxatini kengaytirdi. Ro‘yxatga quyidagilar kiritildi: jurnalistlar Kseniya Kirillova va Masha Mayyers, shoira Natalya Reznik, sobiq deputatlar Kseniya Torstrem va Dmitriy Velikiy, bloger Dmitriy Xramsov va Shaninka (Moskva oliy ijtimoiy-iqtisodiy fanlar maktabi) siyosatshunoslik fakultetining sobiq dekani Vasiliy Jarkov.

Bundan tashqari, Adliya vazirligining ro‘yxatiga Rossiya bo‘ylab mitinglar, norozilik namoyishlari va fuqarolik aksiyalarini yoritib boruvchi Activatica onlayn portali ham kiritilgan.

24 iyun kuni Rossiya prezidenti Vladimir Putin «chet el agentlari» uchun ham Rossiya Federatsiyasida, ham xorijda ma’muriy javobgarlikni kuchaytiruvchi qonunni imzoladi. Endilikda jismoniy shaxslar bo‘lgan «chet el agentlari»ga «qonuniy talablarga rioya qilmaslik» uchun jarimalar 30 dan 50 ming rublgacha, mansabdor shaxslar uchun — 100 dan 300 ming rublgacha, yuridik shaxslar uchun — 300 dan 500 ming rublgacha oshirildi.

Aprel oyida Rossiya Davlat dumasi Rossiya ishtirok etmayotgan xalqaro tashkilotlar yoki xorijiy davlat idoralari qarorlarini amalga oshirishga ko‘maklashuvchi shaxslarni, agar ularning harakatlari mamlakat xavfsizligiga tahdid deb hisoblansa, ularni «chet el agenti» deb e’lon qilishga ruxsat beruvchi qonunni qabul qildi. Bundan tashqari, Rossiyaning harbiy-texnik sohasi haqida ma’lumot to‘playdigan va tarqatadigan shaxslar Rossiya Federatsiyasida «chet el agentlari» deb tan olinishi mumkin.

Mavzuga oid