Yevropaning uch davlati Ukraina uchun AQSh qurollariga pul to‘lamaydi

Yevropaning NATOga a’zo uch davlati – Fransiya, Italiya va Chexiya Ukraina uchun Amerika qurollariga pul to‘lash tashabbusida ishtirok etishdan bosh tortdi. Bu haqda turli g‘arb nashrlari o‘z manbalariga tayanib xabar berdi. Politico nashrining yozishicha, Fransiyaning salbiy pozitsiyasi mamlakat prezidenti Emmanuel Makron uzoq vaqtdan beri yevropaliklar ichki xaridlar orqali o‘z mudofaa sanoatini rivojlantirishni ta’kidlab kelayotgani bilan izohlanadi. Shu bilan birga, Fransiya hukumati budjet taqchilligi bilan kurashishga urinishlar fonida o‘zining mudofaa xarajatlarini oshirishda qiyinchiliklarni boshdan kechirmoqda.

Xuddi shu sabab — budjet tufayli Italiya xaridlar uchun to‘lov tashabbusiga qo‘shilishni istamaydi. Italiya Mudofaa vazirligidagi manbalar La Stampa nashriga bergan intervyusida: «Italiyaning deyarli hech qanday budjet imkoniyati yo‘q. Bu yerda Amerika qurollarini sotib olish haqida hech qachon gap ochilmagan», dedi.

Chexiya bosh vaziri Petr Fiala ham uning mamlakati Ukraina uchun Amerika qurollarini sotib olishda ishtirok etish niyatida emasligini aytdi. «Chexiya Chexiyaning o‘q-dorilar tashabbusi kabi Ukrainani qo‘llab-quvvatlashning boshqa loyihalari va yo‘llariga e’tibor qaratmoqda. Shu sababli, hozirgi bosqichda biz ushbu dasturda ishtirok etishni o‘ylamaymiz», dedi u Publico uchun izohida.