Rustem Umerov boshqa ishga o‘tdi

Ukraina mudofaa vaziri Rustem Umerov Milliy xavfsizlik va mudofaa kengashi kotibi lavozimini egalladi. Ukraina prezidenti Volodimir Zelenskiy tegishli farmonni imzolagan.

Umerov mudofaa vazirligini 2023 yil sentabridan buyon boshqarib kelgan. Joriy yil 14 iyulida Zelenskiy Oliy Radaga bosh vazir Denis Shmigalni mudofaa vaziri lavozimiga tayinlashni taklif qildi. Shmigalning o‘rniga esa iqtisodiyot vaziri Yuliya Sviridenko hukumatning yangi rahbariga aylandi.

Bungacha Umerov Ukrainaning AQShdagi elchisi lavozimiga asosiy nomzod sifatida ko‘rilayotgandi. Yakunda esa Vashingtondagi diplomatik missiyani Ukraina bosh vaziri o‘rinbosari – adliya vaziri lavozimida ishlagan Olga Stefanishina boshqaradigan bo‘ldi.

«RBK-Ukraina» manbalariga ko‘ra, endi Umerov Rossiya bilan muzokaralarga e’tibor qaratadi. Nashr aynan u Istanbul formatidagi muzokaralarda Ukraina guruhi tarkibida bo‘lganini eslatgan.

Rustem Umerov Milliy xavfsizlik va mudofaa kengashi kotibi lavozimida 2024 yil martidan buyon ishlagan (ilgari Ukraina tashqi razvedka xizmati rahbari bo‘lgan) Aleksandr Litvinenkoning o‘rnini egalladi.