Anvar O‘rmonov Toshkent shahri prokurori v.b bo‘lgan

Toshkent shahri prokuraturasiga Anvar O‘rmonov rahbarlik qilayotgani ma’lum bo‘ldi. U bu lavozimda Prezident administratsiyasi huzuridagi Komplayens xizmati rahbari lavozimiga tayinlangan Erkin Yo‘ldoshev o‘rnini egalladi.

Foto: Bosh prokuratura matbuot xizmati

Anvar O‘rmonov Toshkent shahri prokurori vazifasini bajaruvchiga aylangan, bu haqda O‘zbekiston bosh prokuraturasi xabaridan bilish mumkin.

«Toshkent shahrida joriy yilning 15 iyul kunidan 15 avgust kuniga qadar “Xavfsiz va sog‘lom poytaxt” nomi ostida jinoyatchilik va huquqbuzarliklarga qarshi kurash oyligi doirasida profilaktik tadbirlar o‘tkazilishi belgilandi.

Tadbirning asosiy maqsadi – jamoat tartibini ta’minlash, mahallalarda xavfsiz va barqaror muhitni yaratish, shuningdek, fuqarolarning tinch va osuda hayotini kafolatlashga qaratilgan ishlar samaradorligini yanada oshirishdan iborat.

Shu munosabat bilan, o‘tkazilgan saf tayyorgarligida shahar prokurori vazifasini bajaruvchi A.O‘rmonov, shahar IIBB boshlig‘i R.Sultonxo‘jayev va tegishli HMQO rahbarlari ishtirok etib, amalga oshirilishi lozim bo‘lgan vazifalar belgilab berildi», – deyiladi xabarda.

O‘runov bunga qadar poytaxt prokurorining birinchi o‘rinbosari bo‘lgan, ilgari shaharning Shayxontohur va Sergeli tumanlari prokuraturasi boshlig‘i lavozimlarida ishlagan.

Eslatib o‘tamiz, 2023 yil yanvardan beri poytaxt prokurori lavozimida ishlab kelgan Erkin Yo‘ldoshev 2025 yil iyulida Prezident administratsiyasi Komplayens xizmati boshlig‘i lavozimiga tayinlangandi.

#tayinlov #Erkin Yo‘ldoshev #Anvar O‘rmonov