UNRWA: G‘azodagi bolalar to‘yib ovqatlanmaslikdan aziyat chekmoqda

Birlashgan Millatlar Tashkilotining Falastinlik qochqinlarga yordam ko‘rsatish agentligi (UNRWA) bosh komissari Filipp Lazzarini G‘azo sektorida oziq-ovqat taqchilligi tufayli bolalar o‘rtasida to‘yib ovqatlanmaslik kuchayganini aytdi. Uning ta’kidlashicha, bu «sun’iy ravishda ishlab chiqilgan va yaratilgan».

Lazzarini X ijtimoiy tarmog‘idagi postida Isroil gumanitar yordam oqimini cheklayotgan va falastinliklarni ochlikka mahkum etayotgan G‘azodagi vaziyat haqida bayonot berdi.

UNRWA bosh komissari shunday ta’kidladi: «G‘azoda UNRWA sog‘liqni saqlash muassasalarida tekshirilgan har o‘ninchi bola to‘yib ovqatlanmaslikdan aziyat chekmoqda. G‘azoda bolalarning to‘yib ovqatlanmasligi jiddiy oziq-ovqat tanqisligi tufayli yomonlashdi».

7 oylik Salamning o‘tgan hafta to‘yib ovqatlanmaslik tufayli vafot etganini eslatgan Lazzarini, Isroilning shiddatli hujumlari va qattiq blokadadan avval G‘azoda to‘yib ovqatlanmaslik «kam uchraydigan holat» bo‘lganini qo‘shimcha qildi.

U sektordagi ocharchilik, oziq-ovqat tanqisligi va to‘yib ovqatlanmaslik holatlariga e’tibor qaratdi: «Bu odamlar tomonidan yaratilgan vaziyat».

Isroilning oziq-ovqat topish umidi bilan insonparvarlik yordam markazlariga kelgan falastinliklarni nishonga olayotganiga e’tibor qaratgan Lazzarini: «G‘azoda 870 nafardan ortiq och odam tarqatish tizimi buzilganligi sababli oziq-ovqat olishga harakat qilayotganda halok bo‘ldi», dedi.

Lazzarini Birlashgan Millatlar Tashkilotiga o‘z ishini bajarishi va keng ko‘lamli gumanitar yordam yetkazishi uchun ruxsat berilishini talab qilib, G‘azoda o‘t ochishni to‘xtatish bo‘yicha har qanday kechikish ko‘proq qurbonlarga olib kelishini aytdi.