Toshkentda UzFace fuqarolarni aniqlash tizimi sinov tariqasida joriy etilishi mumkin

Vazirlar Mahkamasining "2025-2026 yillarda sun’iy intellekt texnologiyalari sohasidagi ustuvor loyihalarni amalga oshirish chora-tadbirlari to‘g‘risida"gi qarori qabul qilindi.

Hujjat bilan 2025-2026 yillarda sun’iy intellekt texnologiyalarini joriy etish bo‘yicha ustuvor loyihalar ro‘yxati tasdiqlandi:

Raqamli texnologiyalar vazirligi tizimiga kiruvchi tashkilotlar tomonidan (64 ta loyiha);
vazirlik va idoralar tomonidan (22 ta loyiha).

Xususan, ustuvor loyihalar qatorida quyidagilarni ta’kidlash mumkin:

• farmatsevtika preparatlari bozori ehtiyojlarini tahlil qilish va bashorat qilish uchun dasturiy ta’minot ishlab chiqish;
• klinik qarorlar qabul qilishni avtomatlashtirish va tibbiy yordam sifatini oshirish uchun sun’iy intellektga asoslangan raqamli tibbiy yordamchi dasturiy ta’minotini ishlab chiqish;
• o‘smalar, yallig‘lanish jarayonlari va boshqa patologik o‘zgarishlarni aniqlash uchun kompyuter tomografiyasi va rentgenografiya tasvirlarini tahlil qiluvchi dasturiy mahsulot yaratish;
• aerokosmik monitoring sharoitida qishloq xo‘jaligi ekinlari (bug‘doy va paxta) hosildorligini bashorat qilish bo‘yicha tanlangan hududlarda pilot loyihasini amalga oshirish;
• quyosh panellarini joylashtirishning mavjud sxemalarini va o‘rnatish uchun yuqori samarali joylarni aniqlashda kosmik monitoringda sun’iy intellektdan foydalanish, tanlangan hududlarda tajriba loyihasini amalga oshirish;
• Toshkent temiryo‘l vokzallariga kirish joylarida UzFace fuqarolarni aniqlash tizimini sinov tariqasida joriy etish va hokazo.

Raqamli texnologiyalar vazirligi 2026 yil 1 iyunga qadar Toshkent shahridagi Inha universiteti uchun parallel hisoblash, mashinali o‘rganish va sun’iy intellekt texnologiyalarini joriy etish bo‘yicha boshqa loyihalar uchun yuqori unumli hisoblash klasteri hamda katta ma’lumotlar bazalari uchun uskunalar, shu jumladan grafik protsessorlar (GPU) xarid qilinishini ta’minlashi lozim;