O‘zbekiston | 15:59 / 16.07.2025
8260
2 daqiqa o‘qiladi

Qashqadaryodagi gaz zapravkasida katta yong‘in chiqdi

Kun.uz obunachilarining xabar berishicha, Ko‘kdala tumani Yettitom shaharchasi hududida kuchli portlash kuzatilgan va olov balandligi o‘nlab metrga ko‘tarilgan. FVV «Oltindala» MFYda joylashgan gaz quyish shoxobchasi hududida yong‘in sodir bo‘lgani va uni o‘chirish ishlari olib borilayotganini ma’lum qildi.

Qashqadaryo viloyati, Ko‘kdala tumani Yettitom shaharchasi hududida kuchli portlash sodir bo‘ldi. Kun.uz obunachilarining xabar berishicha, bugun, 16 iyul kuni 14:30lar chamasida hududdagi katta yoqilg‘i quyish shoxobchalaridan birida portlash sodir bo‘lgan. Portlash bir nechta obektda kuzatilgan, olov balandligi o‘nlab metrga ko‘tarilgan.

Favqulodda vaziyatlar vazirligining ma’lum qilishicha, bugun soat 14:40larda Qashqadaryo viloyati FVBga, Ko‘kdala tumani, «Oltindala» MFYda joylashgan gaz quyish shoxobchasi hududida yong‘in sodir bo‘layotganligi to‘g‘risida xabar kelib tushgan.

Xabarga asosan, yong‘in-qutqaruv ekipajlari voqea joyiga 14:45 da yetib borib, yong‘in soat 15:00 da o‘rab olingan va hozirda uni bartaraf etish ishlari olib borilmoqda.

Vaziyat to‘liq Qashqadaryo viloyati FVB nazoratida. FVB gaz quyish shoxobchasida portlash bo‘lgani va jarohatlanganlar haqida ma’lumot bermadi.

Mavzuga oid