Xitoy O‘zbekistonda suv resursini tejash loyihalariga jalb etiladi

Tadbirda provinsiyaning mas’ul iqtisodiy tuzilmalari, biznes uyushmalari va yetakchi mahalliy kompaniyalar vakillari ishtirok etdi. Yig‘ilganlar uchun O‘zbekistonning investitsiyaviy imkoniyatlari, savdo-iqtisodiy va turizm salohiyatiga bag‘ishlangan taqdimot o‘tkazildi.

Unda mamlakatda xorijiy sarmoyadorlar uchun yaratilgan qulay sharoitlar, soliq va bojxona imtiyozlari, maxsus iqtisodiy zonalarda ishlash imkoniyatlari, eksportni qo‘llab-quvvatlash choralari va mamlakatning barqaror ijtimoiy-iqtisodiy o‘sish tendensiyalari haqida batafsil ma’lumot berildi.

O‘zbekistonning sayyohlik jozibadorligi va Xitoydan kelgan sayyohlar uchun soddalashtirilgan shart-sharoitlar, jumladan, vizasiz rejim va Xitoyning turli shaharlaridan to‘g‘ridan to‘g‘ri aviareyslarning muntazam ravishda yo‘lga qo‘yilgani qayd etildi.

Chjetszyan provinsiyasida sanoat, "yashil" energetika, energiyani tejash va yangi materiallar ishlab chiqarish sohalari jadal rivojlanmoqda. Xitoy biznesi O‘zbekistondagi loyihalarda ishtirok etishga, xususan, qishloq xo‘jaligi va suv resurslarini tejash sohalarida hamkorlik qilishga qiziqish bildirdi.

Anjumanda mamlakatda ishlayotgan Xitoyning Holley Group kompaniyasi xodimlari O‘zbekistondagi tajribalari haqida so‘zlab berdi.

Tadbir yakunida Chjetszyan provinsiyasi kompaniyalari vakillaridan iborat delegatsiyaning O‘zbekistonga biznes-missiyasini tashkil etishga kelishib olindi.