AQSh Kanada bilan barcha savdo muzokaralarini to‘xtatdi

AQSh prezidenti Donald Tramp Truth Social ijtimoiy tarmog‘iga «Kanada bilan barcha savdo muhokamlarini» to‘xtatishini va ushbu qaror zudlik bilan kuchga kirishini ma’lum qildi.

«Biz keyingi yetti kun ichida Kanadani Amerika Qo‘shma Shtatlari bilan biznes olib borish uchun to‘lashlari kerak bo‘lgan bojdan xabardor qilamiz», — deb yozadi AQSh prezidenti.

Trampning bayonotidan ayon bo‘lishicha, uning qarori Kanada hukumati tomonidan Amerika kompaniyalarining raqamli xizmatlariga nisbatan joriy etilgan «qo‘pol solig‘iga» javoban qabul qilingan.

«Kanada — savdo olib borish juda qiyin bo‘lgan mamlakat, xususan, ular yillar davomida fermerlarimizda sut mahsulotlari uchun 400 foizgacha boj undirgan — endi Amerika texnologik kompaniyalari uchun raqamli soliq joriy etmoqda. Bu bizning mamlakatimizga to‘g‘ridan to‘g‘ri va surbetlarcha hujum», — deb yozadi u.

19 iyun kuni Kanada moliya vaziri Fransua-Filipp Shampan AQSh kompaniyalarining raqamli xizmatlarini soliqqa tortish kechiktirilmasligi va 30 iyunda kuchga kirishini ma’lum qilgan edi. Soliq Kanada foydalanuvchilari uchun taqdim etilgan raqamli xizmatdan tushadigan yillik daromadning 3 foizini tashkil etadi.

Savdo bojlari Amerika iqtisodiyotiga 50-60 milliard dollar daromad olib kelgan. 28 may kuni AQSh xalqaro savdo bo‘yicha federal sudi prezident Trampning Xitoy, Kanada va Meksikaga nisbatan joriy etgan bojlarini noqonuniy deb topgandi. Keyinroq AQSh Apellyatsiya sudi ushbu qarorni rad etdi.