Xitoy O‘zbekistonda "aqlli" logistika omborlarini quradi

Transport vazirligi ma’lumotiga ko‘ra, muloqot chog‘ida mamlakat transport-logistika sohasini rivojlantirish, ushbu yo‘nalishda Xitoy kompaniyalari va moliya tashkilotlari bilan hamkorlikda yangi infratuzilma loyihalarini amalga oshirish istiqbollari muhokama etildi.

Uchrashuvda ZTO Express vakillari tomonidan kompaniya faoliyat yo‘nalishlari yuzasidan taqdimot o‘tkazildi. Unda ta’kidlanishicha, kompaniya logistika xizmatlari sohasida katta mavqega ega bo‘lib, yuklarni qabul qilish, saqlash, saralash hamda omborlardan yakuniy iste’molchilargacha bo‘lgan yuk yetkazib berish xizmatlarini ko‘rsatish bilan shug‘ullanadi. Alibaba Group, JD.com, Pinduoduo kabi yirik elektron tijorat operatorlari kompaniyaning asosiy mijozlari hisoblanadi.

Muzokaralar davomida kompaniya prezidenti Xu Syanlyan O‘zbekistonda quyidagi yo‘nalishlarda hamkorlikdagi loyihalarini amalga oshirishga tayyorligini ma’lum qildi. Jumladan, aeroportlar hududida omborxonalar barpo etish va jihozlash, "aqlli" logistika omborlarini tashkil etish, O‘zbekiston hududida asbob-uskunalarni yig‘ish va keyinchalik qo‘shni mamlakatlarga eksport qilish uchun sanoat parklarini tashkil etish hamda bojxona rasmiylashtiruvi tizimini axborotlashtirish.

O‘z navbatida, transport vaziri Ilhom Mahkamov ZTO Express kompaniyasiga Navoiy viloyati hududida logistika markazlarini barpo etish, Toshkent davlat Transport universiteti bilan hamkorlikni yo‘lga qo‘yish, universitet talabalari va o‘qituvchilari uchun Xitoy logistika xizmatlari sohasidagi tajribani o‘rganishga qaratilgan o‘quv dasturlarini tashkil etish kabi qator takliflarni ilgari surdi.

Muloqot yakunida tomonlar muhokama etilgan masalalar bo‘yicha keyingi qadamlarni belgilash maqsadida ishchi guruh tuzishga kelishib oldi.