Prezident administratsiyasi nazorat inspeksiyasi tugatildi, uning rahbari Saidlaziz Saidkarimov prezident tanqidiga uchradi

Yig‘ilishda Prezident administratsiyasining Nazorat inspeksiyasi faoliyati tanqidiy ko‘rib chiqildi.

«Nazorat inspeksiyasiga nima uchun shuncha vakolat berilgan? Vazirlarga yaxshi ko‘rinish uchun, ular nimani bersa, shuni ko‘tarib kelmasdan, masalalarni o‘rganib, aybdorlarni jazolash bo‘yicha nega taklif kiritmaydi?» - dedi davlat rahbari.

Faoliyatidagi kamchilik va muammolarni hisobga olib, Prezident administratsiyasining Nazorat inspeksiyasini bugunning o‘zida tugatishga qaror qilindi.

Shu bois, ijro intizomini mustahkamlash, aholi muammolari bilan ishlash bo‘yicha mutlaqo yangi tizim yaratilishi belgilandi.

Bundan buyon ijro intizomiga Hisob palatasi mas’ul bo‘ladi, uning vakolatlari kengaytiriladi.

Endilikda Hisob palatasi qarorlar bilan berilgan mablag‘lar faqatgina to‘g‘ri sarflanishini emas, balki nima samara bergani, aholi bundan qanchalik rozi bo‘lganini ham o‘rganadi.
 
Palata raisi har bir qaror ijrosi natijadorligini tahlil qilib, zaif nuqtalar, «aravasini tortmayotgan» rahbarlar va ishlamayotgan tizimlar bo‘yicha o‘z taklifini har oyda prezidentga kiritadi.

Ma’lumot uchun, Prezident administratsiyasining Nazorat inspeksiyasiga 2022 yil avgustidan buyon Saidlaziz Saidkarimov rahbarlik qilib kelayotgandi. U muqaddam bosh prokurori o‘rinbosari va Hisob palatasi raisi o‘rinbosari lavozimlarida ishlagan. U inspeksiya rahbari lavozimida keng vakolatlarga ega edi, xususan, prezident topshiriqlari, qaror va farmonlar ijrosini nazorat qilib, ularga sovuqqonlik bilan yondashayotgan rahbarlarga chora ko‘rish bo‘yicha takliflar kiritib borishi belgilangandi.