Kreml Medinskiyni yana Ukraina bilan muzokaralarga jo‘natadi

Rossiya AQSh prezidenti Donald Tramp iltimosiga zid ravishda yana bir bor Putinning yordamchisi Vladimir Medinskiyni Ukraina bilan muzokaraga jo‘natadi. Rossiya tashqi ishlar vazirligi rasmiy vakili Mariya Zaxarova 29 may, payshanba kuni «Rossiya 24» telekanalida 2 iyun kuni Istanbulda bo‘lib o‘tishi rejalashtirilgan uchrashuvda Rossiya delegatsiyasi tarkibi o‘zgarishsiz qolishini ma’lum qildi.

Medinskiy 2022 yilda Istanbulda va shu yilning may oyida Ukraina bilan muzokaralarda Rossiya delegatsiyasiga boshchilik qilgan, biroq uning ishtiroki g‘arb vositachilarining noroziligiga sabab bo‘lgan. Tramp ma’muriyati uni muzokaralar jarayonidan chetlashtirishni talab qildi.

Kiyev va Moskva o‘rtasidagi aloqalarni tashkil qilish uchun mas’ul bo‘lgan amerikalik rasmiylar muzokaralarda «qattiq siyosat tarafdorlari» ishtirok etishiga qarshi chiqdi, jumladan, Rossiyaning sobiq madaniyat vaziri, Rossiyaning Ukrainaga bostirib kirishini oqlovchi targ‘ibot tarixi bo‘yicha darslik muallifi Medinskiy. Medinskiy rus xalqida «qo‘shimcha xromosoma» borligi haqidagi bayonoti bilan ham mashhur.