Germaniya TIV: AQSh Rossiyaga qarshi yangi sanksiyalar kiritadi

AQSh hukumati Rossiyaga qarshi yangi sanksiyalarni ishlab chiqmoqda va prezident Donald Trampning so‘zlariga qaramay, ularni qabul qilishi mumkin. Bu haqda 20 may, seshanba kuni ZDF telekanalida Germaniya tashqi ishlar vaziri Yoxann Vadeful aytib o‘tdi.

ZDF jurnalisti Trampning 20 may kuni AQSh Rossiyaga qarshi yangi sanksiyalar kiritmasligi haqidagi bayonotiga e’tibor qaratdi. «Bu noto‘g‘ri taassurot. AQSh Senatida katta miqdordagi sanksiyalar to‘plami, bu boradagi qonun loyihasi bor. Uni allaqachon Senatdagi 80 ga yaqin hamkasblar qo‘llab-quvvatlagan», — deb javob berdi Vadeful.

Uning so‘zlariga ko‘ra, 14-15 may kunlari Antaliyada bo‘lib o‘tgan NATO tashqi ishlar vazirlarining yig‘ilishida u yangi sanksiyalar to‘g‘risidagi qonun loyihasi hammuallifi, respublikachi senator Lindsi Grem bilan gaplashgan. «Hozir oqibatlar bo‘lishi kerak degan aniq qat’iylik bor. Biz AQShdagi hamkasblarimiz bilan — ma’muriyat bilan ham, kongressmenlar bilan ham bu haqda gaplashmoqdamiz», — dedi Vadeful. U, shuningdek, AQSh davlat kotibi Marko Rubioni ham sanksiya muzokaralaridagi sheriklari qatorida tilga oldi.

«Amerika ham harakat qiladi. Bu aniq aytilgan. Hozir strategik sabr-toqat kerak. Biz bu masalada ochiq turishimiz kerak», dedi Germaniya tashqi ishlar vaziri. «AQSh keng qamrovli sanksiyalar paketini tayyorlamoqda. Endi u Kongress muhokamasiga taqdim etiladi. Albatta, u bu muhokamalardan o‘tib ketsagina kuchga kirishi mumkin. Lekin eshitishimcha, bu sodir bo‘ladi. Biz bu borada hamkasblarimiz bilan yaqin aloqadamiz».