Metroning 9 ta bekatida ona-bola xonasi va hojatxona qurilishi va’da qilingandi. Bu amalga oshyaptimi?

O‘tgan yili noyabr oyida noma’lum erkak “Paxtakor” bekatida hojatini chiqargani videosi tarqalib, keng muhokamalarga sabab bo‘lgach, Toshkent metropoliteni 9 ta bekatda ona-bola xonasi va hojatxona qurilishi va 1-bosqich boshlanganini e’lon qilgandi.

Kun.uz shu ishlar ijrosi yuzasidan Toshkent metropoliteni matbuot xizmati bilan bog‘landi. Ta’kidlanishicha, 1-bosqichda hozircha faqat “Buyuk ipak yo‘li” bekatida shunday maxsus xonalar tashkil qilingan.

“Amir Temur xiyoboni” va “Paxtakor” bekatida qurilishning yakuniy bosqichi ketmoqda, “Beruniy” metro bekatida esa montaj va demontaj ishlari qolgan.

“Qurilish jarayonining o‘zi: o‘rnatish, kerakli jihozlar bilan ta’minlanishi – umuman ishlarni amalga oshirish uchun sharoit noqulay. Bu yer ustida qilinadigan jamoat hojatxonalaridan farq qiladi. Shuning hisobiga cho‘zilishi mumkin.

Hamma bekatimiz har xil yer qatlamida joylashgan, shunga qarab hammasidagi qurilishga har xil vaqt ketadi. Hozir bir vaqtning o‘zida “Paxtakor” bilan “Amir Temur xiyoboni” bekatlarida qurilyapti, 90-95 foiz ishi bitgan. “Beruniy”dagisida esa montaj-demontaj ishlari ketyapti”, – deydi korxona matbuot kotibi To‘ychi Mirzayev.

Hozircha 1-bosqich qachon yakunlanib, maxsus xonalar ish boshlashi, qolaversa, 2-bosqich qurilishi qachondan start olishi noma’lum.

Eslatib o‘tamiz, 9 ta bekatda qurilayotgan hojatxonalar pulli bo‘lib, uning narxi tadbirkor tomonidan belgilanishi ma’lum qilingan.

Maxsus xonalar quriladigan bekatlar quyidagilar:

• “Buyuk ipak yo‘li”;
• “Amir Temur xiyoboni”;
• “Mustaqillik maydoni”;
• “Paxtakor”;
• “Olmazor”;
• “Beruniy”;
• “Chorsu”;
• “Do‘stlik”;
• “Bodomzor”.