O‘zbekiston merganlari Turkiyadagi musobaqada yana oltin medal oldi

Turkiyada 5–16 may kunlari V Xalqaro «Eng ilg‘or merganlar jamoasi» musobaqasi o‘tkazildi. 15 davlatning 48 ta jamoasi ishtirokidagi bellashuvda O‘zbekiston mudofaa vazirligi jamoasi oltin medalni qo‘lga kiritdi, deb xabar bermoqda vazirlik.

Bahslar Turkiyaning Isparta shahridagi «Komando» tog‘-o‘quv mashqlar markazida tashkillandi. Unda O‘zbekiston, Turkiya, Pokiston, Qatar, Ozarboyjon, Italiya, Birlashgan Arab Amirliklari – o‘ndan ortiq davlat, shuningdek, kuzatuvchi maqomida Turkmaniston, Qozog‘iston, Buyuk Britaniya va Kuvayt ishtirok etdi. Musobaqa ishtirokchilari guruhlarga bo‘linib, 15 ga yaqin shart bo‘yicha bahs olib bordi.

Xususan, jamoalar yuqori burchak ostida o‘q otish, gazniqob taqib, jangovar o‘q otish, noaniq masofalarga noqulay istehkomdan o‘q otish, turli to‘siqlar ortidan o‘q otish, havodagi vertolyotdan o‘q otish, orolni himoya qilish va qayiqdan jangovar o‘q otish, nishonga sezdirmay yaqinlashib o‘q otish, 5 km masofadan yuk va qurol bilan yugurib kelib, sovuq stvoldan o‘q otish, tunda nomalum masofalarga o‘q otish va «syurpriz» shartlarini bajardi.

Turkiyada o‘tkaziladigan mazkur musobaqada O‘zbekiston jamoasi 4-marta ishtirok etmoqda, 2022 va 2023 yillarda 2-o‘rinni, 2024 yilda esa 1-o‘rinni egallagandi.