Yevroittifoq Ukraina tovarlariga bojlarni qaytarish niyatida

Britaniyaning The Financial Times gazetasi 14 may, chorshanba kuni manbalarga tayanib yozishicha, Yevropa Ittifoqi bir necha hafta ichida Ukraina tovarlarining YeIga bojsiz importini bekor qiladi. Nashr manbalariga ko‘ra, Bryussel 2022 yilda Rossiya qurolli bosqinidan so‘ng Kiyev uchun erkin savdo kelishuvidan tashqari joriy qilingan imtiyozli bojsiz rejimni to‘xtatmoqchi. Ushbu rejim Ukraina tovarlarining aksariyat qismini Yevropa Ittifoqiga bojsiz olib kirishga ruxsat beradi. Rejim uch haftadan keyin, 6 iyunda tugaydi.

Polsha shunday tashabbus bilan chiqqanidan keyin Yevropa Ittifoqi Kiyev bilan maxsus savdo bitimini bekor qilishga qaror etdi va bunda o‘z dehqonlari manfaatlarini ko‘zda tutyapti. Bryussel umumiy savdo kelishuvi yangilanayotgan vaqtda o‘tish choralarini joriy qilishni rejalashtirmoqda. Diplomatlar The Financial Times'ga o‘tish bo‘yicha taklif Ukraina qishloq xo‘jaligi mahsulotlari uchun boj olinmaydigan kvotalar soni keskin qisqartirilishini va yillik bojsiz kvotani 12 oylik kvotaga bo‘lishni nazarda tutishini aytdi.

Nashr manbalariga ko‘ra, o‘tish davri choralari Ukrainadan yetkazib beriladigan makkajo‘xori, shakar, asal va parranda go‘shtiga eng katta ta’sir ko‘rsatadi. Shunday qilib, makkajo‘xori uchun boj olinmaydigan kvotalar 4,7 million tonnadan 650 ming tonnagacha, parranda go‘shti uchun kvota 57,1 ming tonnadan 40 ming tonnagacha, shakar uchun esa 109 ming tonnadan 40,7 ming tonnagacha kamayadi.