Shavkat Mirziyoyev Yevropa Ittifoqining Markaziy Osiyo bo‘yicha maxsus vakili bilan uchrashdi

Mintaqaviy kun tartibidagi dolzarb masalalar yuzasidan fikr almashildi, shuningdek, bo‘lajak tadbirlar rejasi ko‘rib chiqildi.

Prezident Shavkat Mirziyoyev 13 may kuni Yevropa Ittifoqining (YeI) Markaziy Osiyo bo‘yicha maxsus vakili Eduards Stipraysni qabul qildi.

Qayd qilinishicha, YeI maxsus vakili Yevrokengash prezidenti Antoniu Koshta va Yevrokomissiya prezidenti Ursula fon der Lyayyenning salomi va eng ezgu tilaklarini yetkazdi.

Shu yil aprel oyida Samarqand shahrida o‘tgan «Markaziy Osiyo - Yevropa Ittifoqi» birinchi sammitida qabul etilgan qarorlarni amalga oshirish doirasida ikki tomonlama va mintaqaviy hamkorlikni kengaytirish masalalari muhokama qilindi.

Investitsiyaviy va moliyaviy-texnik hamkorlik bo‘yicha umumiy qiymati 12 milliard yevrolik aniq loyihalarni tez fursatda tayyorlash va ilgari surishga alohida e’tibor qaratildi.

Mintaqaviy kun tartibidagi dolzarb masalalar yuzasidan fikr almashildi, shuningdek, bo‘lajak tadbirlar rejasi ko‘rib chiqildi.

#Yevropa Ittifoqi #Eduards Stiprays #Shavkat Mirziyoyev