“Oltin konini portlatmoqchi edim” – Xatirchida fuqaro uyida portlovchi qurilma saqlab kelgani aniqlandi

Xatirchi tumanida portlatish qurilmasini yasagan shaxsga sud hukmi o‘qildi. Kun.uz sud hujjati bilan tanishdi.

Hukmda keltirilishicha, 2025 yil 14 yanvar kuni Xatirchi tumani IIB hamda DXX xodimlari tomonidan tezkor-qidiruv tadbirlari olib borilgan. Unda tumanning Baxshijar mahallasida yashovchi, 1981 yilda tug‘ilgan Sh.N. o‘z uyidagi sandiqda qo‘lbola usulda yasalgan 3 dona portlovchi qurilmani saqlab kelayotgani aniqlangan.

Ma’lum bo‘lishicha, Sh.N. ushbu portlovchi qurilmalarni 2024 yilning mart oylarida internetda ko‘rish orqali yasagan. IIV EKBMning 2025 yil 20 yanvardagi portlash texnikasi ekspertiza xulosasiga ko‘ra, topilgan qurilmalar “elektr cho‘lg‘amlik portlatish qurilmalari” bo‘lgan.

Sh.N. sudda portlovchi qurilmalarni oltin konini portlatish maqsadida yasaganini bildirgan.

“2024 yil mart oylarida tarkibida oltin zarralari bo‘lish mumkin bo‘lgan toshlarni qazib olish maqsadida Oltinsoy qishlog‘ining dasht hududidagi konga borib turardim. Toshlarni qazib olish juda qiyin edi. Shunda konlarda toshlarni maydalash uchun portlovchi moddalardan foydalanilishi haqida eshitdim.

So‘ngra internet tarmog‘idan qo‘lbola usulda portlovchi modda tayyorlash usulini ko‘rib o‘rgandim. Uyimda ancha yillardan qolib ketgan porox, qishloq xo‘jaligida foydalaniladigan o‘g‘it va 3 dona elektr kabelidan foydalanib, ularni skotch yordamida birlashtirgan holda portlovchi qurilma yasadim. Lekin uni biror marotaba ham ishlatmadim. Chunki shundan keyin biror marotaba konga bormadim. Toshkent shahriga ketib, qurilishlarda ishlab yurdim. Qurilmalarni esa uydagi sandiqqa solib qo‘ydim”, degan erkak o‘z ko‘rsatmasida.

Shuningdek, Sh.N. portlovchi qurilmalarni yasashda unga hech kim yordamlashmaganini ma’lum qilgan hamda suddan yengillik so‘ragan.

Jinoyat ishlari bo‘yicha Xatirchi tuman sudining 2025 yil 9 apreldagi hukmiga ko‘ra, Sh.N. Jinoyat kodeksining 248-moddasi (o‘qotar qurolning, o‘q-dorilarning, o‘qotar qurol asosiy qismlarining, portlovchi moddalarning, portlatish vositalarining yoki portlatish qurilmalarining qonunga xilof muomalasi) 1-qismida nazarda tutilgan jinoyatni sodir qilganlikda aybli deb topilgan. Unga 2 yil muddatga ozodlikni cheklash jazosi tayinlangan.