O‘zbekiston bo‘yicha 1 may kunidan mahalla raislari saylovlari boshlanadi

Saylov 9 ming 452 ta mahallada o‘tkaziladi va iyul oyigacha davom etadi.

Fuqarolar yig‘ini raisi saylovlarini tashkil etish va o‘tkazish masalalariga bag‘ishlangan brifingda O‘zbekiston mahallalari uyushmasi axborot xizmati rahbari Jobir Asqarov ushbu jarayon haqida ma’lumot berdi.

Qayd qilinishicha, 9 ming 452 ta mahallada rais saylovlari 1 may kunidan boshlanadi.

«Fuqarolar yig‘ini raisi saylovi to‘g‘risida»gi qonuniga kiritilgan o‘zgartish va qo‘shimchalarga ko‘ra, endi mahalla fuqarolar yig‘ini raisi vakolat muddati 5 yil bo‘ladi.

Ta’kidlanishicha, saylov o‘tkaziladigan kun, vaqt va joy haqidagi ma’lumotlar O‘zbekiston mahallalari uyushmasining rasmiy veb-saytiga joylashtiriladi.

May-iyul oylarida bo‘lib o‘tadigan saylovlarda ishchi guruhlar tomonidan 208 ta tuman (shahar) ko‘maklashuvchi komissiyalarning qarori bilan mahallalarda vakillar miqdori belgilangan. Saylovda 2 million 591 823 nafar vakil ishtirok etishi kutilmoqda.

#saylov #O‘zbekiston mahallalari uyushmasi #Mahalla raisi