Toshkentdagi O‘zbekiston ovozi ko‘chasining bir qismi 30 maygacha yopiladi

Mirzo Ulug‘bek tumanidagi O‘zbekiston ovozi ko‘chasining bir qismida vaqtincha transport vositalari harakati to‘xtatiladi. Bu haqda tuman hokimligi matbuot xizmati xabar berdi.

Ma’lum qilinishicha, O‘zbekiston ovozi ko‘chasining Yahyo G‘ulomov ko‘chasi bilan kesishmasidan Shahrisabz ko‘chasigacha bo‘lgan qismi 24 aprel soat 7:00 dan 30 maygacha transport harakati uchun yopiladi. Hokimlikka ko‘ra, ko‘cha 7/24 ko‘chaga aylanmoqda.

Mazkur ko‘chaning infratuzilmasi o‘zgarib, aholiga, yo‘lovchilarga va shaharsozlik normalariga to‘la mos tushadigan maskan qilinadi.

Avvalroq Mirzo Ulug‘bek tumanidagi KHAY va Oqqo‘rg‘on ko‘chalari kesishmasi issiqlik tarmoqlarining quvurlari almashtirilishi sababli 1 maygacha yopilgandi.