Toshkentda ilk jamoatchilik yashil parki ochiladi

Toshkent shahri, Yunusobod tumanidagi xaroba va qarovsiz bo‘lgan hudud jamoatchilik yashil parkiga aylantiriladi. Bu haqda Ekologiya vazirligi xabar berdi.

Qayd qilinishicha, park hududi 2020 yilgacha tashlandiq holatda bo‘lgan. Hozir 1200 tupdan ortiq daraxt va 23 ming tup buta ekilib, 7,5 gektar maydonda yashil bog‘ barpo etilmoqda.

Ta’kidlanishicha, poytaxtdagi birinchi jamoatchilik yashil parki shovqin-surondan xoli, ekologik talablarga to‘liq javob beradi. Hududda atirgul bog‘i barpo qilinadi, tabiiy ko‘l yaratiladi, qushlar uchun inlar quriladi. Hamma yo‘laklar toshlardan, o‘rindiqlar esa qurigan daraxtlardan, ya’ni to‘liq tabiiy materiallardan qilinadi. Shuningdek, yil davomida ketma-ket gullaydigan o‘simliklar ekiladi va bu parkning doimiy ko‘rkam qiyofa kasb etishiga xizmat qiladi.

Xabarga ko‘ra, jamoat parkiga kirish mutlaqo bepul bo‘ladi. Park hududida chiqindi tashlash qat’iy taqiqlanadi (chiqindilarni faqat parkka kirish va chiqish joyida o‘rnatilgan chiqindi qutilariga tashlanishi mumkin), bu esa hududning ekologik toza maskanga aylanishini ta’minlaydi. Park to‘liq Yevropa, jumladan, Yaponiya tajribasi asosida barpo qilinmoqda, bu yerda faqat mahalliy, o‘zimizning iqlimga mos daraxtlar ekiladi.

Xabarda parkning qachon ishga tushirilishi haqida ma’lumot berilmagan.