Zelenskiy Rossiyaga qarshi «kuchli sanksiyalar paketlari»ni anons qildi

Ukraina prezidenti Volodimir Zelenskiy o‘zining an’anaviy tungi videomurojaatida Rossiyaga qarshi yangi milliy sanksiyalar paketlari tayyorlanayotganini ma’lum qildi.

Foto: V.Zelenskiyning videomurojaatidan skrinshot

«Biz o‘zimizning, ukrain sanksiyalar paketlarimizni tayyorlayapmiz — maxsus xizmatlar tomonidan tegishli asoslar taqdim etilgan. Bu kuchli sanksiyalar bo‘ladi va u Moskva urushni moliyalash uchun foydalanadigan «xufiyona flot» tankerlariga qarshi ham, urushni targ‘ib qiluvchilar — bizning mudofaamizni zaiflashtirishga urinayotgan va Rossiyaga yordam beruvchi shaxslarga nisbatan ham qo‘llanadi.

Shuningdek, ayrim mansabdorlarga qarshi ham — ular barcha ukrainaliklarga tanish, ta’sirga ega bo‘lgan shaxslar.

Ayni vaqtda tegishli farmonlar tayyorlanmoqda, barchasi bosqichma-bosqich amalga oshiriladi. Biz, shuningdek, o‘z sanksiyalarimiz Yevropa Ittifoqi va dunyodagi boshqa kuchli yurisdiksiyalar qarorlari bilan muvofiqlashishi uchun ham ish olib boryapmiz», — dedi Zelenskiy.

#Ukraina #sanksiyalar #Volodimir Zelenskiy