Namanganda YPX mashinasi bilan to‘qnashgan Cobalt haydovchisi qariyb 2 oydan beri komada yotgani ma’lum bo‘ldi

2025 yilning 19 fevral kuni ertalab Pop tumani hududida Cobalt va YPX mashinasi ishtirokida YTH sodir bo‘lgan. Bu haqda Kun.uz’ga Cobalt haydovchisining yaqinlari ma’lum qildi.

Xizmat mashinasi YPX xodimi Farhod Mamajonov boshqaruvida bo‘lgan. YTH oqibatida Cobalt haydovchisi, 1983 yilda tug‘ilgan Bahrom Dadaboyev og‘ir tan jarohati olgan hamda shifoxonaning jonlantirish bo‘limiga yotqizilgan.

“Shundan beri koma holatida yotibdi, ahvoli og‘ir. Shifokorlar yaqinda ko‘zini ochib-yuma boshlaganini aytishgandi, biroq yana og‘irlashib qoldi”, deydi haydovchining yaqin qarindoshi Kun.uz jurnalisti bilan suhbatda.

Bahrom Dadaboyevning yaqinlari YPX xodimi xabar olmagani, ko‘mak bermayotganini aytib, norozilik bildirmoqda.

Kun.uz holatga oydinlik kiritish maqsadida YHXX matbuot xizmati rahbari Zoyir Yo‘ldoshev bilan bog‘landi. Uning bildirishicha, xodim xizmat mashinasini o‘z yo‘nalishida boshqarib ketayotgan bo‘lgan. Asosiy yo‘ldan ichki yo‘lga burilayotgan Cobalt mashinasi bexosdan uning yo‘liga chiqqan.

“YPX xodimi insoniylik yuzasidan Cobalt haydovchisi holidan xabar olish maqsadida shifoxonaga borgan. Biroq uning yaqinlari janjal ko‘targani bois qaytib bormagan”, deydi Zoyir Yo‘ldoshev.

Qo‘shimcha qilinishicha, YPX xodimi Farhod Mamajonovga nisbatan xizmat tekshiruvi o‘tkazilgan hamda uning harakatlarida jinoyat alomatlari yo‘q deb topilgan.