Xitoy Trampning bojlariga javoban Hollivud filmlari importini qisqartiradi

XXR kinematografiya ishlari bo‘yicha milliy boshqarmasi AQSh prezidenti Donald Trampning Xitoy mahsulotlariga joriy qilgan bojlariga javoban Hollivud filmlari importini cheklashini ma’lum qildi, deb yozmoqda Reuters.

«Biz bozor qoidalariga bo‘ysunib, auditoriya tanlovini hurmat qilamiz va Amerika filmlari importi sonini sezilarli darajada qisqartiramiz», — deyiladi boshqarma bayonotida.

Qayd etilishicha, Xitoyda umumiy kassa yig‘imlarining atigi 5 foizini Hollivud filmlari tashkil etadi. Hollivud studiyalari esa XXRda o‘z filmlaridan tushgan kassa daromadlarining faqat 25 foizini olmoqda. Ta’kidlanishicha, so‘nggi yillarda xitoylik tomoshabinlarning G‘arb filmlariga qiziqishi mahalliy ko‘ngilochar madaniyatning rivojlanishi fonida pasayib ketgan. 2020 yildan beri mahalliy filmlar yillik kassa yig‘imlarining qariyb 80 foizini barqaror ravishda olib kelmoqda, garchi ilgari bu ko‘rsatkich 60 foizni tashkil etgan bo‘lsa-da.

Xitoyda 1995 yildan beri xorij kartinalari prokatiga kvota mavjud — ularning soni yiliga 10 tadan oshmasligi kerak. Keyinroq ular 34 tagacha oshirilgan.

Xitoy 10 apreldan AQShdan import qilinadigan tovarlarga tarif stavkasini 34 foizdan 84 foizgacha oshirdi. Bu Vashingtonning Xitoy tovarlariga bojlarni 104 foizgacha oshirishiga javob bo‘ldi. AQSh prezidenti Donald Tramp esa XXR mahsulotlariga bojlarni 125 foizgacha oshirib, Pekinni jahon bozorlariga nisbatan «hurmatsizlik»da aybladi.