Qonun kuchga kirganidan 5 yil o‘tgach, samaradorligi baholanishi mumkin

Endilikda qonun loyihalari parlamentga kiritilayotganda loyihaning huquqiy ekspertizasi, korrupsiyaga qarshi ekspertizasi va loyiha bo‘yicha o‘tkazilgan jamoatchilik muhokamasi natijalari ham taqdim etilishi kerak.

O‘zbekiston prezidenti bugun, 10 aprel kuni imzolagan qonun bilan ayrim qonun hujjatlariga o‘zgartirish va qo‘shimchalar kiritildi.

Unga ko‘ra, endilikda qonun loyihalarini parlamentga kiritishda quyidagilar ham loyiha bilan birga taqdim etilishi kerak:

loyihaning huquqiy ekspertizasi natijalari;
loyihaning korrupsiyaga qarshi ekspertizasi natijalari;
loyiha bo‘yicha o‘tkazilgan jamoatchilik muhokamasi natijalari.

Qonunchilik tashabbusi huquqi sub’yektiga o‘zi kiritgan qonun loyihasi ikkinchi o‘qishda qabul qilinguniga qadar, Oliy Majlis Qonunchilik palatasiga taklif kiritish orqali uni chaqirib olish huquqi berilmoqda.

Endilikda qonunlar kuchga kirgan kundan e’tiboran 5 yil o‘tgach, mas’ul davlat organlarining va Oliy Majlis palatalari qo‘mitalarining tashabbusiga ko‘ra, qonunning samaradorligini, unda belgilangan maqsadga va kutilayotgan natijalarga erishilganini aniqlash uchun qonunning tartibga solish ta’siri baholashdan o‘tkazilishi mumkin.

#Qonunchilik palatasi #korrupsiya #jamoatchilik muhokamasi