Uzbekistan Airways yangi samolyotlarida internetdan foydalanish imkoniyati bo‘ladi

Uzbekistan Airways yangi Airbus A321neo havo laynerlarini HBCplus ilg‘or bort aloqasi tizimi (IFC), Airbus kompaniyasining multiorbital aloqani qo‘llab-quvvatlovchi moslashuvchan sun’iy yo‘ldosh texnologiyasi bilan jihozlaydi.

Ta’kidlanishicha, ushbu tashabbus aviakompaniyaning bort xizmatini modernizatsiya qilish va yo‘lovchilar uchun zamonaviy raqamli yechimlarni joriy etish strategiyasining bir qismidir.

Qayd qilinishicha, HBCplus tizimining joriy etilishi yo‘lovchilarga o‘rta va uzoq masofali yo‘nalishlarda ham kontent ko‘rish, xabar almashish va onlayn ishlash uchun yuqori tezlikdagi internet aloqasini ta’minlaydi. Tizimni o‘rnatish 2026 yildan, birinchi A321neo havo kemalarining kelishi bilan boshlanadi.

Uzbekistan Airways – milliy aviatashuvchi va O‘zbekistonning eng yirik aviakompaniyasi, floti Boeing 787/767, Airbus A320ceo/A320neo/A321neo, L-410 va ATR-72 havo kemalaridan iborat.