Duma rossiyaliklarni chet el tashkilotlari bilan hamkorlik uchun 7 yilgacha qamashga ruxsat berdi

Shuningdek, Davlat Dumasi Rossiyani tark etgan shaxslarni 20 turdagi jinoyatlar bo‘yicha sirtdan sud qilishga ruxsat berdi va «chet el agenti» sifatida tan olish mezonlarini kengaytirdi. Qonunlar paketi «mamlakat suverenitetini himoya qilish» maqsadida qabul qilingani ma’lum qilindi.

Xususan, armiyani «obro‘sizlantirish» (JK 280.3-moddasi) va Rossiya ishtirok etmaydigan xalqaro tashkilotlarga «manfaatdorlik yoki pulli shartnoma asosida» ko‘mak berish (284.3-modda) 7 yilgacha ozodlikdan mahrum qilish bilan jazolanadi. Agar fuqaro shunday manfaatli niyat bilan sanksiyalarga chaqirgan bo‘lsa (284.2-modda), unga 5 yilgacha qamoq jazosi berilishi mumkin. Barcha holatlarda mulkni musodara qilish ham ko‘zda tutilgan. Muhim o‘zgarishlardan biri — armiyani «obro‘sizlantirish» va sanksiyalarga chaqiriqlar uchun jinoyat ishi qo‘zg‘atish uchun endilikda ma’muriy jazoni kutmasdan to‘g‘ridan to‘g‘ri jinoiy ish ochish mumkin bo‘ladi.

Ikkinchi qonun loyihasi Rossiyani tark etgan fuqarolarni «diskreditatsiya», harbiy «feyklar» tarqatish, «natsizmni oqlash», «harbiy dafn joylari va yodgorliklarga shikast yetkazish» moddalari bo‘yicha sirtdan sud qilish imkonini beradi. Shuningdek, terrorizm, ekstremizm, separatizm, ommaviy tartibsizlikka chaqirish, tajovuzkor urush boshlash, Rossiya hududiy yaxlitligiga tahdid, sanksiyalar, «xorijiy agent» majburiyatlaridan bo‘yin tovlash, «noxush tashkilotlar» faoliyatida ishtirok etish yoki uni moliyalashtirish holatlari ham bu tartibga kiradi.

Uchinchi qonun loyihasi «chet el agentlari» reyestriga kiritish uchun asoslar ro‘yxatini kengaytiradi. Vakolatli organlar bu maqomni xalqaro tashkilotlar yoki chet davlat organlarining Rossiya xavfsizligiga qarshi yo‘naltirilgan qarorlarini bajarishda ishtirok etgan shaxslarga berishlari mumkin. 

Masalan, bu orqali Xalqaro jinoiy sud (Haaga) tomonidan Ukraina bolalarini zo‘ravonlik bilan deportatsiya qilgani uchun prezident Vladimir Putinni hibsga olish orderini amalga oshirishga urinayotgan shaxslar ham qamrab olinadi. Shuningdek, mamlakat xavfsizligiga qarshi foydalanilishi mumkin bo‘lgan harbiy yoki harbiy-texnik xarakterdagi ma’lumotlarni yig‘ishga fuqarolarni jalb etganlar ham «chet el agenti» deb topiladi. Bunday faoliyatni moliyalashtirish ham alohida asos sifatida belgilangan.