Bo‘stonliqda qum-shag‘al qazib olinishi tufayli tabiatga 4,5 mlrd so‘m zarar yetdi

Toshkent viloyati Bo‘stonliq tumanidagi Oqsoqota soyidan noqonuniy ravishda qum-shag‘al qazib olganlar aniqlandi.

Viloyat Ekologiya, atrof-muhitni muhofaza qilish va iqlim o‘zgarishi boshqarmasi xabariga ko‘ra, reyd davomida fuqarolar soyning oqim bo‘ylab chap tarafidan davlat raqami yechib olingan yuklagich yordamida qum-shag‘al aralashmalarini MAN yuk mashinasiga hech qanday ruxsatnomasiz yuklab berayotgani aniqlangan.

Holat bo‘yicha surishtiruv jarayonida haydovchilar ushbu joydan qum-shag‘al aralashmalarini qazib olishni bir fuqaroning og‘zaki topshirig‘iga asosan tosh maydalash sexiga olib borib to‘kayotgani va sexning nomini bilmasligini ma’lum qilgan.

Voqea joyida Bo‘stonliq tuman IIB YPX xodimi jalb qilinib, yuk tashuvchi avtotransport vositasi vaqtinchalik jarima maydonchasiga joylashtirilgan.

Huquqbuzarlar ushbu harakatlari bilan «Tabiatni muhofaza qilish to‘g‘risida»gi va «Yer osti boyliklari to‘g‘risida»gi qonun talablarini buzgan. 

Holat bo‘yicha tabiatga 4 mlrd 504 mln 378 ming so‘m miqdorida zarar yetkazilgan, to‘plangan hujjatlar Bo‘stonliq tumani prokuraturasiga yuborilgan.