Avtobusda yo‘l haqini to‘lamaganlarga reyd boshlandi, 56 kishi jarimaga tortildi

Shu yil 1 yanvaridan boshlab Toshkentda avtobuslar naqd pulda yo‘l haqini qabul qilmay, to‘lov elektronlashtirildi. Yo‘lovchilar faqat ATTO, bank kartalari yoki QR kodli bir martalik chiptalar orqali to‘lovni amalga oshiradigan bo‘ldi.

Transport nazorat inspeksiyasiga ko‘ra, ayrim yo‘lovchilar yo‘l haqini hech qanday sababsiz to‘lamasdan avtobusdan tushib ketayotgani tez-tez uchramoqda, shu sababli inspeksiya xodimlari tomonidan doimiy reyd tadbirlari tashkil etila boshlangan.

“Toshshahartransxizmat” AJ bunday tadbirlar 14 mart sanasidan boshlangani va 1 aprelga qadar reydda chiptasiz harakatlangan 56 kishi jarimaga tortilganini ma’lum qildi. Jarima miqdori 37 500 so‘mni tashkil etadi.

Ma’lumot uchun, MJtKning 144-moddasiga ko‘ra, yo‘lovchining trolleybusda, tramvayda, shahar ichida va shahar atrofiga qatnaydigan avtobusda chiptasiz yurishi — BHMning o‘ndan bir qismi (bugungi kunda 37 500 so‘m) miqdorida jarima solishga sabab bo‘lishi belgilangan.

Eslatib o‘tamiz, avvalroq Toshkent shahar transport bosh boshqarmasi boshlig‘i Mirakbar Ikromov Kun.uz bilan suhbatda poytaxtda 2 600 ta avtobekat mavjudligini, ularning 300 dan ortig‘ida avtobus uchun bir martalik QR-chiptalarni olish shoxobchalari mavjud emasligini aytgandi. Mas’ul ayni damda poytaxtdagi mavjud 5000 ga yaqin infokiosklarni tizimga integratsiya qilish ishlari ketayotganini ta’kidlagandi.

O‘z o‘rnida, elektron to‘lovlarning afzalligi bo‘lib, yo‘l haqi 1 700 so‘mni tashkil qiladi. Bir soat ichida bir nechta avtobuslardan foydalanish esa arzonlashadi, masalan, 1-martasiga 1 700 so‘m, 2-martasiga 700 so‘m, 3-martasiga esa bepul.