Xitoy Tayvan yaqinida harbiy o‘quv mashg‘ulotlarini boshlab, orol prezidentini «parazit» deb atadi

Xitoy Qurolli kuchlari armiyasi, floti, aviatsiya va raketa qo‘shinlari 1 apreldan Tayvan oroli yaqinida qo‘shma o‘quv mashg‘ulotlarini boshladi, deb xabar beradi CNN.

«Bu Tayvan mustaqilligi tarafdori bo‘lgan ayirmachi kuchlar uchun jiddiy ogohlantirish va kuchli tiyib turuvchi omil bo‘lib, Xitoyning suvereniteti hamda milliy birligini himoya qilish uchun qonuniy va zaruriy choradir», — deyiladi XXR armiyasi qo‘mondonligi bayonotida.

O‘quv mashg‘ulotlari davomida xitoylik harbiylar Tayvanga «bir nechta yo‘nalishda yaqinlashadi» va turli manyovrlarni sinovdan o‘tkazadi.

Xitoy harbiylari o‘z bayonotida Tayvan prezidenti Lay Lay Tsindeni «parazit» deb atadi. XXR tomonidan e’lon qilingan rolikda Tayvan rahbari qo‘lida ovqat uchun mo‘ljallangan tayoqni yonayotgan orol uzra ko‘tarib turgan qo‘ng‘iz ko‘rinishidagi multqahramon sifatida tasvirlagan.

Xitoy Xalq-ozodlik armiyasi Tayvan atrofidagi qo‘shma harbiy mashg‘ulotlar boshlanishiga bag‘ishlangan videoni e’lon qildi.

Tayvan rasmiylari harbiy mashg‘ulotlarni «haddan tashqari mas’uliyatsizlik» deb atab, demokratik davlatlarni «Xitoyni muammolar keltirib chiqarayotgani uchun qoralashga» chaqirdi. Tayvan Mudofaa vazirligi esa Xitoy Xalq Respublikasi mashg‘ulotlarini kuzatish va «tegishli choralarni ko‘rish» maqsadida samolyotlar va kemalar yuborilganini ma’lum qildi.

Xitoy Tayvanni o‘zining hududi deb hisoblaydi. XXR hukumati bir necha bor orolni kuch bilan nazorat ostiga olishga tayyorligini bildirgan. Bloombergʼga ko‘ra, Xitoy Tayvanga hujum qilsa, urush jahon yalpi ichki mahsulotining 10 foiziga tushishi bilan birga, XXRning AQSh bilan to‘g‘ridan to‘g‘ri harbiy to‘qnashuvlariga sabab bo‘ladi.