Namanganning “Ibratli sudya”si xavfli retsidivist fohishaxona saqlovchini ozod qildi

Namangan viloyati sudining jinoyat ishlari bo‘yicha sudyasi Avazbek Inomov xavfli retsidivist, qolaversa, avvalgi jinoyat uchun sud tayinlagan shartli jazo muddatini o‘tab yurgan qo‘shmachini* apellyatsiya instansiya sudida qamoqdan chiqarib yuborgani ma’lum bo‘ldi. Kun.uz ushbu jinoyat ishi bo‘yicha sud hujjatlarini o‘rgandi.

*Ma’lumot uchun:

Qo‘shmachilik – bu manfaatdor shaxslarga jinsiy aloqa qilish yoxud jinsiy ehtiyojlarini g‘ayritabiiy usulda qondirish uchun jinsiy aloqa sheriklarini topishiga yordam kursatishdir.

Foxishaxona saqlash – bu uning mijozlariga jinsiy aloqa qilishlari yoki o‘z jinsiy ehtiyojlarini g‘ayritabiiy usulda qondirishlari uchun maxsus mo‘ljallangan har qanday xonani yoki boshqa joyni haq evaziga berishidir.

Manba: M.X.Rustambayev, Jinoyat kodeksiga sharhlar, Adolat 2016y 131-bet (TDYuU elektron kutubxonasi)

“Xijoma”dagi intim xizmat

Jinoyat ishlari bo‘yicha Namangan shahar sudining 2023 yil 28 sentabrdagi hukmi bilan ikki kishi – 1984 yilda tug‘ilgan Davronova Jamila Abdusamatovna hamda 1994 yilda tug‘ilgan Dadabayeva Shohsanam Shuhrat qizi jinoiy jazoga tortilgan.

Hukmda keltirilishicha, xavfli retsidivist (shaxsning ilgari qasddan sodir etgan jinoyati uchun sudlanganidan keyin qasddan yangi jinoyat sodir etishi retsidivist jinoyat deb topiladi) hisoblangan Shohsanam Dadabayeva sherigi Jamila Davronova bilan til biriktirib, faoliyat yuritgan. Ular 2023 yil 25 aprel kuni Yangi Namangan tumanidagi “Xijoma” massajxonasiga kelgan shartli mijozga shu yerdagi ishchi bilan 200 ming so‘m evaziga jinsiy aloqa qilishga sharoit yaratib berishgan. Ular huquqni muhofaza qiluvchi organlar xodimlari tomonidan o‘tkazilgan tezkor tadbirda ushlangan.

“Xijoma” massajxonasini Shoxsanam Dadabayeva ijara asosida ishlatib kelgan. Jamila Davronova esa u yerda massajchi bo‘lib ishlagan.

Jamila Davronova sudda aybiga to‘liq iqrorlik bildirgan.

Jazo

Sud hukmi bilan Jamila Davronova Jinoyat kodeksining 131-moddasi (qo‘shmachilik qilish yoki fohishaxona saqlash) 3-qismi bilan aybli deb topilgan. Unga 3 yil muddatga ozodlikni cheklash jazosi tayinlangan.

Ayni shu moddaning 4-qismi “b” bandi (takroran, xavfli retsidivist tomonidan qo‘shmachilik qilish yoki fohishaxona saqlash) bilan aybli deb topilgan Shohsanam Dadabayeva esa 5 yil 1 oyga ozodlikdan mahrum qilingan. Unga nisbatan qo‘llangan munosib xulq-atvorda bo‘lish haqida tilxat ehtiyot chorasi o‘zgartirilib, sud majlisida qamoqqa olingan.

O‘zgargan hukm

Shohsanam Dadabayeva jinoyat ishlari bo‘yicha Namangan shahar sudining hukmidan norozi bo‘lib apellyatsiya shikoyati kiritgan. Jinoyat ishi Namangan viloyati sudi sudyasi Avazbek Inomov raisligida apellyatsiya instansiyasida ko‘rib chiqilgan.

Apellyatsiya instansiyasining 2023 yil 7 noyabrdagi ajrimi bilan dastlabki sud instansiyasi hukmining Shohsanam Dadabayevaga oid qismi o‘zgartirilgan. Unga qo‘llangan ozodlikdan mahrum qilish jazosi Jinoyat kodeksining 72-moddasiga asosan shartli hisoblanib, 3 yil sinov muddati belgilangan va Dadabayeva sud zalida qamoqdan ozod qilingan.

Apellyatsiya instansiyasi sudi Shohsanam Dadabayeva “ayol kishi ekani, 3 nafar voyaga yetmagan farzandi borligi hamda yakka tartibda tadbirkorlik faoliyati bilan shug‘ullanishini” inobatga olgan.

Inomov raislik qilgan sud hay’ati nima uchundir Dadabayeva retsidivist bo‘lgani holda jinoyat ishlari bo‘yicha Yangiqo‘rg‘on tuman sudining 2022 yil 23 sentabrdagi hukmi bilan tayinlangan sinov muddati mobaynida yangi jinoyat sodir etganiga ko‘z yumgan.

“Xaloskor” sudya

Namangan viloyati sudining jinoyat ishlari bo‘yicha sudlov hay’ati sudyasi Avazbek Inomov shu tariqa Shohsanam Dadabayevani xavfli retsidivist bo‘lgani holda avvalroq sud belgilagan sinov muddati davrida yana jinoyat sodir qilganiga qaramay, sud zalida qamoqdan ozod qilib yuborgan.

Sudya Avazbek Inomov avvalroq Pop tumani hokimining 2,5 yil muddatga ozodlikdan mahrum qilingan o‘g‘li G‘ulom Sultonovni apellyatsiya instansiyasida sud zalida ozod qilgani ortidan “tilga tushgandi”.

O‘shanda Namangan viloyat sudi apellyatsiya instansiyasining 2024 yil 7 avgustdagi ajrimi bilan 200 mln so‘mdan oshiq elektr tokini o‘g‘irlagan Sultonov G‘ulom A’zamovichga nisbatan chiqarilgan sud hukmi o‘zgartirilib, u sud zalidan ozodlikka chiqarilgan. Ya’ni sudlanuvchiga tayinlangan ozodlikdan mahrum qilish jazosi 3 yil muddatga ozodlikdan cheklash jazosiga o‘zgartirilgan. Apellyatsiya instansiyasi sudiga Avazbek Inomov raislik qilgan.

Biroq OAV va ijtimoiy tarmoqlarda ko‘plab muhokamalarni keltirib chiqargani ortidan G‘ulom Sultonov ishi Namangan viloyat sudida taftish instansiyasida ko‘rib chiqilgan edi. Chiqarilgan ajrimga asosan, apellyatsiya instansiyasi sudi ajrimi bekor qilinib, Sultonovga nisbatan birinchi instansiya sudi chiqargan hukm o‘z kuchida qoldirilgan. Ya’ni u 2,5 yilga ozodlikdan mahrum etilgandi.

Ko‘p o‘tmay Avazbek Inomov Sudyalar oliy kengashi qarori bilan “2024 yil yakunlari bo‘yicha faoliyatida alohida o‘rnak va namuna ko‘rsatgan hamda yuqori reyting ko‘rsatkichlarga ega bo‘lgani” uchun “Ibratli sudya” mukofoti bilan taqdirlangandi.

Ruslan Saburov,
Kun.uz