Fransiyada samolyot parvoz vaqtida yo‘qolgan telefon tufayli shoshilinch ortga qaytdi

Air France aviakompaniyasining Parijdan Puant-a-Pitrga uchayotgan reysi yo‘lovchilardan birining mobil telefoni bortda yo‘qolgani sabab yarim yo‘ldan qaytishga majbur bo‘ldi.

Ekipaj a’zolari bortda yo‘qolgan telefon xavfli vaziyat yuzaga keltirishi mumkinligidan xavotirlangan. Bu xavotirlar telefonning batareyasi bilan bog‘liq edi. Gap shundaki, agar qurilmaning batareyasi haddan tashqari qizib ketsa yoki shikastlansa, samolyotda yong‘in keltirib chiqarishi mumkin edi.

Telefonni qidirish uchun dastlabki urinishlar besamar ketgan. Parvoz vaqtida bortda 375 yo‘lovchi va 12 nafar ekipaj a’zosi bo‘lgan. Ular Parijga eson-omon qo‘nishgan, ammo parvoz ikki soatdan ortiq vaqtga kechikkan.

Keyinchalik telefon texnik xizmatlar tomonidan topildi. Shundan so‘ng, reys belgilangan manzilga jo‘nab ketdi.

Avvalroq Los-Anjyelesdan Xitoyga uchgan Amerika samolyoti uchuvchida pasport yo‘qligi sababli AQShga qaytishga majbur bo‘lgandi. Hodisa tufayli samolyot Shanxayga olti soat kechikib yetib keldi.