ChatGPT bilan muntazam muloqot xavfli oqibatlarga olib kelishi ma’lum qilindi

OpenAI va Massachusets texnologiya instituti tadqiqotchilari ChatGPT bilan muntazam muloqot qilish odamlar bilan kam suhbatlashishga va yolg‘izlik hissini kuchaytirishga olib kelishi mumkinligini aniqladi. Bu haqda Bloomberg xabar bermoqda.

Tajribalardan birida olimlar bir oy mobaynida ChatGPT’dan foydalanuvchi 1000 ga yaqin kishini kuzatdi. Ularga har kuni kamida besh daqiqa davomida chat-botning matnli yoki ovozli versiyasi bilan muloqot qilish taklif etildi.

Natijalar quyidagicha bo‘ldi:

• inson ChatGPT’dan qanchalik ko‘p foydalansa, unga shunchalik ko‘proq bog‘lanib qoladi;
• sun’iy intellektga bo‘lgan ishonchning yuqoriligi yolg‘izlik tuyg‘usi va texnologiyaga qaramlikni keltirib chiqaradi;
• botning ovozi hissiy bog‘liqlik darajasiga ta’sir ko‘rsatmaydi.

Ikkinchi tadqiqotda ChatGPT bilan olib borilgan 3 million suhbat o‘rganilib, so‘rovnoma o‘tkazildi. Natijalar shuni ko‘rsatdiki, foydalanuvchilarning juda kam qismi sun’iy intellekt bilan muhim shaxsiy mavzularni muhokama qilgan.

2022 yilda ChatGPT ishga tushirilganidan beri generativ sun’iy intellektning ommaviyligi keskin oshdi. Dasturchilar muloqotni yanada tabiiyroq qiladigan ovozli funksiyalarni joriy etmoqda. Olimlarning fikricha, bu holat parasotsial aloqalarning shakllanishiga olib kelishi mumkin, bunda foydalanuvchi chat-botni jonli suhbatdosh sifatida qabul qiladi.

Psixologlar sun’iy intellekt bilan muloqotning, ayniqsa yoshlar va ruhiy qiyinchiliklarni boshdan kechirayotgan shaxslarga ta’siri haqida xavotir bildirmoqda. OpenAI bu masalani o‘rganishni davom ettirmoqda, biroq hozircha xulosa chiqarishga erta.

“Tadqiqotimiz ChatGPT’dan foydalanish bevosita yolg‘izlikni keltirib chiqarishini isbotlamaydi”, — deb ta’kidlaydi Massachusets texnologiya instituti aspiranti Keti Men’in Fang. “Biz sun’iy intellektdan faol foydalanadigan kishilar bilan uni ishlatmaydigan odamlarni taqqoslab ko‘rmadik”.

Chat-bot qaramlikka olib keladimi yoki yolg‘iz odamlar unga ko‘proq murojaat qiladimi, hozircha noma’lum.