Eron yadroviy kelishuvni qayta tiklashdan bosh tortdi

Eron yadroviy dasturi bo‘yicha Birgalikdagi harakatlar rejasini hozirgi shaklda qayta tiklashdan bosh tortdi. Bu haqda TIV rahbari Abbos Aroqchiy ma’lum qildi.

Uning so‘zlariga ko‘ra, Birgalikdagi harakatlar rejasi formulasidan Eron va G‘arb o‘rtasidagi yangi kelishuvni tuzishda asos sifatida foydalanish mumkin.

«Birgalikdagi harakatlar rejasi hozirgi ko‘rinishda bizga maqbul emas. Vaziyatimiz sezilarli darajada o‘zgardi va biz oldingi shartlarga qayta olmaymiz», — deydi Aroqchiy .

Vazirning qo‘shimcha qilishicha, Buyuk Britaniya, Germaniya va Fransiya Eronga qarshi sanksiyalarni yechish masalasida AQShga ta’sir ko‘rsatishni va’da qilgan.

«Biz Birgalikdagi harakatlar rejasidagi formulaga kelish uchun, shuningdek, yadroviy dasturga bo‘lgan ishonchni mustahkamlash va G‘arb davlatlari sanksiyalarni yechishi uchun Yevropaning uchta davlati bilan muzokaralar olib bormoqdamiz. Ushbu sanksiyalar yevropaliklar emas, balki amerikaliklar qo‘lida. Yevropaliklar ushbu masalada amerikaliklarga qarshi turishlarini bildirmoqda», — deydi TIV rahbari.

Eslatib o‘tamiz, Eron 2020 yil yanvar oyida AQSh kuchlari Trampning buyrug‘iga binoan Eron generali Qosim Sulaymoniyni Bag‘dodda o‘ldirgandan so‘ng yadroviy kelishuvdan butunlay chiqib ketgan edi.

AQSh prezidenti Donald Tramp o‘tgan oy Eron bilan yangi yadroviy kelishuvga erishish imkoniyatini ko‘tardi. U Eronni «bombardimon qilmasdan» kelishuvga erishmoqchi ekanini ma’lum qildi va Eron ham buni xohlasa kerak, dedi. 7 mart kuni Amerika prezidenti Eron bilan munosabatlarda «qiziq vaqtlar» yaqinlashganini aytdi.

Eron prezidenti Mas’ud Pizishkiyon mart oyi boshida AQSh bilan muzokaralar olib borish zarur deb hisoblagan edi. Biroq Xominaiy bunga qarshi chiqdi – prezident esa bunga e’tiroz bildirolmaydi.