Tramp AQSh Grenlandiyani qo‘shib olishiga ishonyapti

«O‘ylaymanki, shunday bo‘ladi», - dedi AQSh prezidenti NATO bosh kotibi bilan bo‘lib o‘tgan matbuot anjumanida Grenlandiyaning anneksiya qilinishi mumkinligi haqidagi savolga javoban.

Foto: AP

Amerika Qo‘shma Shtatlari Grenlandiyani anneksiya qiladi, Donald Trampning bunga ishonchi komil. 13 mart, payshanba kuni Oq uyda NATO bosh kotibi Mark Ryutte bilan uchrashuvda AQSh prezidenti orolning anneksiya qilinishi mumkinligi haqidagi savolga «O‘ylaymanki, shunday bo‘ladi», deb javob berdi. «Bizga bu (Grenlandiya) xalqaro xavfsizlik uchun kerak», deb tushuntirdi Tramp. U, shuningdek, Ryutte Grenlandiyaning AQShga qo‘shilishida «muhim rol» o‘ynashiga ishonch bildirdi.

O‘z navbatida, Mark Ryutte «NATOni bu masala bo‘yicha muhokamalarga tortmoqchi emasligini» aytdi, lekin Rossiya va Xitoyning ushbu mintaqaga qiziqishi ortib borayotganligi sababli Arktika xavfsizligi uchun Grenlandiya muhimligini tan oldi.

Grenlandiyani o‘z ichiga olgan Daniya parlamentining mudofaa qo‘mitasi raisi Rasmus Yarlov o‘zining X ijtimoiy tarmog‘idagi sahifasida AQShning orolga da’volari «ikki NATO davlati o‘rtasida urushga» olib kelishi mumkinligini yozdi va Mark Ryuttening Tramp bilan uchrashuvdagi xatti-harakatlarini ham tanqid qildi. «Grenlandiya Daniyadan darhol mustaqillikka qarshi ovoz berdi va hech qachon Amerikaniki bo‘lishni xohlamaydi», deya qo‘shimcha qildi Yarlov.

Germaniya va Fransiya Trampning tahdidlari fonida Daniyani qo‘llab-quvvatlamoqda

Daniya bosh vaziri Mette Frederiksen 28 yanvar kuni Berlinda Germaniya kansleri Olaf Shols bilan AQShning yangi prezidenti Donald Trampning Daniya qirolligi tarkibiga kiruvchi Grenlandiya ustidan nazoratni o‘z qo‘liga olish haqidagi takroriy tahdidlari fonida Yevropa birligi masalasini muhokama qildi. Frederiksen qo‘shma matbuot bayonotida «Yevropa birligi va yaqin hamkorlikni» yanada dolzarb qiladigan «noaniq haqiqatlar» haqida gapirdi, deb xabar beradi AFP.

O‘z navbatida, Olaf Shols «chegaralarni kuch bilan o‘zgartirmaslik» kerakligini ta’kidlab, «kim ta’qib qilishidan qat’iy nazar» ekspansionistik intilishlarni qoraladi.

Daniya bosh vaziri Shols bilan uchrashuvdan so‘ng Parij va Bryusselga tashrif buyurdi va u yerda Fransiya prezidenti Emmanuel Makron va NATO bosh kotibi Mark Ryutte bilan uchrashdi. «Siz davlatlar hududlari va suverenitetini hurmat qilishingiz kerak. Bu biz Ikkinchi jahon urushidan beri birga qurgan xalqaro hamjamiyatning asosiy elementidir», — dedi Frederiksen Makron bilan uchrashuvidan keyin.

#AQSh #Grenlandiya