Stiv Uitkoff: AQSh va Kiyev tez orada resurslar bo‘yicha kelishuvni imzolaydi

AQShga Ukrainaning mineral resurslariga, jumladan, nodir metallariga kirish huquqini beruvchi bitim shu hafta ichida imzolanadi. Bu taxminni 23 fevral, yakshanba kuni CNN telekanalida AQSh prezidenti Donald Trampning Yaqin Sharq bo‘yicha maxsus vakili Stiv Uitkoff bildirdi.

The New York Times gazetasining yozishicha, Tramp va Uitkoff o‘rtasida shaxsiy, ishonchli munosabatlar mavjud. Nashr eslatishicha, bir necha hafta oldin Tramp Uitkoffning vakolatini Yaqin Sharq tinchlik jarayoni doirasidan tashqariga yashirincha kengaytirdi va iste’fodagi general Kit Kellog uning Ukraina va Rossiya bo‘yicha maxsus vakili etib tayinlanganiga qaramay, unga Rossiya rahbariyati bilan Ukraina bo‘yicha muzokaralar kanalini ochishni topshirdi.

Ukraina prezidenti Volodimir Zelenskiy 23 fevral kuni CNN telekanaliga bergan intervyusida Ukraina rahbarining Vashington bilan kelishuvni dastlab ishlab chiqilganidek qabul qilishdan bosh tortganiga ishora qilib, «bir hafta oldin bu boradagi qaror bo‘yicha ikkilanib yurganini» bildirdi. «AQSh prezidenti Donald Tramp unga xabar yubordi. U endi ikkilanmaydi», — deya qo‘shimcha qildi Stiv Uitkoff.

O‘z navbatida, AQSh moliya vaziri Skott Bessent 23 fevral kuni Fox New telekanaliga bergan intervyusida: «Men Zelenskiy minerallar bo‘yicha bitim imzolashini kutyapman», dedi.

Zelenskiy AQSh bilan kelishuv bo‘yicha muzokaralarning borishi haqida

Zelenskiyning o‘zi ham shu kuni Vashington-Kiyev tabiiy resurslar bo‘yicha kelishuvi yuzasidan muzokaralar olg‘a surilayotganini aytdi. «Hammasi yaxshi», — deya uning so‘zlarini keltiradi Reuters.

Bundan tashqari, Ukraina prezidenti resurslar kelishuvi xavfsizlik kafolatlari kontekstida ko‘rib chiqilsa, o‘z mamlakatiga AQSh qo‘shinlarining kiritilishini mantiqiy qadam deb bilishini ta’kidladi.

Bir kun avval Sky News telekanali anonim ukrainalik manbaga tayanib, Kiyev nuqtayi nazaridan, Ukrainaning mineral resurslari bo‘yicha AQSh tomonidan taklif etilgan kelishuv «qator muammoli masalalarni o‘z ichiga olganini» xabar qildi. Xususan, unda «Ukrainaning faqat bir tomonlama majburiyatlari» mavjud, shuning uchun Volodimir Zelenskiy ushbu bosqichda bu hujjatni imzolashga tayyor emas, dedi manba.

Ayni paytda Trampning milliy xavfsizlik bo‘yicha maslahatchisi Mayk Uolts 21 fevral kuni Merilend shtatidagi chiqishi chog‘ida shunday dedi: «Bu xulosa. Prezident Zelenskiy bu bitimni imzolaydi va buni tez orada ko‘rasiz».