HAMAS garovga olingan 4 kishining jasadini Isroilga topshirdi

HAMAS garovga olingan shaxslardan 4 nafari jasadini G‘azo sektori janubidagi Xon-Yunis hududida Xalqaro Qizil Xoch qo‘mitasi vakillari orqali Isroilga topshirdi. Halok bo‘lganlar orasida 33 yoshli Shiri Bibas va uning ikki o‘g‘li: besh yoshli Ariyel va ikki yoshli Kfir, shuningdek, 83 yoshli Oded Lifshits bor.

HAMAS jasadlarni topshirish jarayonini tashviqot tadbiriga aylantirdi: sahna o‘lganlarning fotosuratlari aks ettirilgan plakatlar bilan bezaldi. Hamaschilar, shuningdek, Isroil bosh vaziri Binyamin Netanyahuning vampir suratini, Isroil rahbariyatini ayblovchi shiorlar bilan birga Isroil bayrog‘i tushirilgan tobutlarni namoyish qildi.

Qurbonlarning jasadi shaxsini va o‘limi sabablarini aniqlash uchun Abu Kabir shahridagi Sud-tibbiyot ekspertizasi institutiga olib ketildi. Bosh vazir Netanyahu voqeani mamlakat uchun «shok va qayg‘u kuni» deb atadi va kelajakda bunday fojialarning oldini olish uchun barcha choralarni ko‘rishga va’da berdi. O‘z navbatida HAMAS bolalar va Shiri Bibasning o‘limida Isroil hukumatini aybladi.

Bibaslar oilasi 2023 yil 7 oktyabrda Kibuts Nir Oz shahriga hujum paytida HAMAS jangarilari tomonidan asirga olingan edi. Oilaning otasi Yarden Bibas 2025 yil 1 fevralida HAMAS va Isroil o‘rtasidagi kelishuv doirasida qo‘yib yuborildi. Shiri Bibas va uning bolalari, hamaschilarning so‘zlariga ko‘ra, Isroilning bombardimonlari oqibatida 2023 yil noyabrida o‘lgan. Ayolning ota-onasi 2023 yil 7 oktyabrda jangarilar tomonidan o‘ldirilgan.