Shols: Rossiyaning g‘alabasi yoki Ukrainaning qulashi «tinchlikka olib kelmaydi»

Rossiyaning urushdagi g‘alabasi yoki Ukrainaning qulashi «tinchlikka olib kelmaydi». Bu haqda Germaniya kansleri Olaf Shols 13 fevral, payshanba kuni Berlinda jurnalistlarga ma’lum qildi.

Siyosatchi AQSh prezidenti Donald Trampning «o‘lim va qon to‘kilishini» to‘xtatish uchun Rossiyaning Ukrainaga qarshi urushi imkon qadar tezroq yakunlanishi kerakligi haqidagi fikriga qo‘shilishini tushuntirdi. U, shuningdek, Oq uy rahbarining Vladimir Putinga qo‘ng‘iroq qilish haqidagi qarorini qo‘llab-quvvatladi va o‘zi ham Rossiya prezidenti bilan gaplashganini eslatdi. Shu bilan birga, Shols Ukraina suverenitetini saqlab qolishga imkon beradigan «uzoq muddatli» va adolatli kelishuvga chaqirdi. «Shuning uchun biz hech qachon buyruq ostidagi tinchlikni qo‘llab-quvvatlamaymiz», deb qo‘shimcha qildi u.

Shols: Tinchlik shartnomasi Ukrainaga majburan yuklanmasligi kerak

Avvalroq Germaniya kansleri Donald Trampning Vladimir Putin bilan muzokaralar haqidagi izohlari fonida Politico nashriga bergan intervyusida Ukrainadagi urushni to‘xtatish bo‘yicha kelishuv Kiyevga majburiyat shaklida yuklanmasligi kerakligini aytdi.

Shuningdek, u Ukrainaga «tinchlik kelishuvidan keyin ham rivojlanishga» imkon berilishi kerakligini, bu uning urushdan oldingidan ko‘ra ko‘proq va G‘arb qurollari bilan jihozlangan «kuchli armiya»ga ega bo‘lishini anglatishini aytdi.