Air Busan samolyotidagi yong‘inga pauerbank sabab bo‘lgani taxmin qilinmoqda

28 yanvar kuni Janubiy Koreyaning Air Busan aviakompaniyasi Airbus A321-200 samolyoti parvozga tayyorlanayotgan vaqtda dum qismida yong‘in sodir bo‘lgan edi.

Ma’lum bo‘lishicha, omadli tasodif tufayli samolyotning parvozi 20 daqiqaga kechiktirilgan.

Janubiy Koreya Yer, infratuzilma va transport vazirligi 30 yanvar kuni samolyotdan qora qutilar olinganini ma’lum qildi. Airbus zavodi shtab-kvartirasi joylashgan Fransiyadan tergovchilar guruhi ham Koreyaga yetib keldi. Ular xalqaro qoidalarga muvofiq tergovga qo‘shiladi.

Yong‘in havo layneri parvozga tayyorlanayotgan vaqtda sodir bo‘lgan. Samolyot bortidagi barcha 176 kishi - 169 yo‘lovchi va 7 ekipaj a’zosi muvaffaqiyatli evuakatsiya qilindi, faqat 7 nafari yengil jarohatlar oldi.

Parvozdagi yo‘lovchilar guvohligiga ko‘ra, yuqori yuk javonidan «qarsillagan» ovoz eshitilgan, keyin esa tutun chiqqan. Shuningdek, styuardessaning guvohlik berishicha, yong‘in 28-qatordagi o‘rindiqlar ustidagi javonda boshlangan.

Tergov hozircha guvohlarning ko‘rsatmalarini tasdiqlagani yo‘q. Biroq, Air Busan rasmiylarining ommaviy axborot vositalariga ma’lum qilishicha, yong‘inga «yo‘lovchining yuqori javonda joylashgan portativ quvvat beruvchi moslamasi (pauerbank) sabab bo‘lgan».