Toshkent viloyatida quduqqa tushib ketgan fuqaro qutqarildi

Favqulodda vaziyatlar vazirligi qutqaruvchilari tomonidan Toshkent viloyatida quduqqa tushib ketgan fuqaro qutqarib olindi. Bu haqda vazirlik matbuot xizmati xabar berdi.

Qayd etilishicha, bugun, 27 dekabr kuni soat 12:37 da Angren shahar Ko‘kterak mahallasi, Musojalil ko‘chasida joylashgan xonadonlarning biridagi quduqqa fuqaro o‘z ehtiyotsizligi oqibatida tushib ketgani to‘g‘risida FVBga xabar tushgan.

FVV qutqaruvchilari zudlik bilan aytilgan manzilga yetib borib, qutqaruv anjomlari yordamida fuqaroni quduqdan chiqarib olgan va unga birinchi tibbiy yordam ko‘rsatilgan.

«Fuqaro yengil tan jarohati olgan va hozirda shifokorlar nazorati ostida, uning sog‘ligi yaxshi holatda», — deyiladi xabarda.

Eslatib o‘tamiz, oktyabr oyi o‘rtalarida Toshkent viloyatida FVB qutqaruvchilari hojatxonaga tushib ketgan qizchani qutqarib qolgandi. Shuningdek, Andijon viloyati Asaka tumanida ham hojatxonaga tushib ketgan qizcha qutqarilgani to‘g‘risida xabar berilgan edi. Noyabr oxirlarida esa Bo‘stonliq tumanida taxminan 5 metrli chuqurlikka tushib ketgan fuqaro qutqarilgandi.