2024 yilgi Navro‘z bayramida umumxalq sayillari va hasharlari, xayriya tadbirlari o‘tkaziladi

Qayd qilinishicha, bayram «Olam nurga to‘lsin sen bilan, Navro‘z!» bosh g‘oyasi asosida umumxalq sayillari shaklida o‘tkaziladi. 

Toshkent shahridagi «Yangi O‘zbekiston» majmuasida alohida dastur asosida xalq sayillari tashkil etiladi. 

Navro‘z bayrami muqaddas Ramazon oyida nishonlanishini inobatga olib, keksa avlod vakillarini, xususan, Ikkinchi jahon urushi qatnashchilari va mehnat fronti faxriylarini har tomonlama e’zozlash, «Mehribonlik», «Saxovat» va «Muruvvat» uylarida yashayotgan shaxslar, ijtimoiy himoya daftarlariga kiritilgan hamda ko‘makka muhtoj insonlar uchun dasturxonlar tashkil etiladi hamda turli xayriya tadbirlari amalga oshiriladi. 

Navro‘z bayrami arafasida barcha hududlarida, ko‘cha, mahalla, tuman va shaharlarda obodonlashtirish va ko‘kalamzorlashtirish ishlariga qaratilgan umumxalq hasharlari o‘tkaziladi. 

Toshkent shahrida Navro‘z bayramiga bag‘ishlab teatrlashtirilgan konsert tomoshasi o‘tkaziladi. 

Qoraqalpog‘iston Respublikasi va viloyatlarda umumxalq sayillari uyushtiriladi. Unga mahalliy folklor guruhlari, badiiy havaskorlik jamoalari, sirk san’ati vakillari, oilaviy ansambllar, baxshilar, shoirlar, shuningdek, professional ijrochilar va iste’dodli estrada artistlari jalb etiladi. 

Bayram tadbirlari Toshkent shahrida – respublika budjeti va Toshkent shahri mahalliy budjeti mablag‘lari hisobidan teng ulushlarda, Qoraqalpog‘iston Respublikasi va viloyatlarda – tegishli mahalliy budjetlar hamda joylardagi homiylik xayriyalari hisobidan qoplanadi.